अन्ततः मेलम्चीया विवाद मन्त्रिपरिषद्य्

येँ – मेलम्ची परियोजना– यात कयाः मेलम्ची खानेपानी आयोजना व खानेपानी मन्त्रालय दथुइ ब्वलंगु विवाद अन्ततः मन्त्रिपरिषद्य् थ्यंगु दु । इटालियन कम्पनी सीएमसी ठेक्का त्वाःथलाः लिहां वंगु न्याला दयेधुंकाः नं आयोजना गुकथं न्ह्याकेगु धकाः क्वःछी मफयेवं प्रधानमन्त्रीया निर्देशन कथं आयोजना बारे मन्त्रिपरिषदं निर्णय यायेत्यंगु खः ।

प्रधानमन्त्रीया निर्देशन कथं खानेपानी मन्त्री बिना मगरं मेलम्चीया ल्यं दनिगु ज्या क्वचायेकेगु सम्बन्धी प्रस्ताव मन्त्रिपरिषदय् यंकादीगु खः । मेलम्चीया ज्या क्वचायेकेत प्रधानमन्त्रीं हे ताकेता यायेवं प्रस्ताव मन्त्रिपरिषद्य् छ्वःगु खः ।

सीएमसीं ज्या पूवंके मफयेवं ठेक्का त्वःताः बिसिउँ वंगु खःसां मन्त्री मगर धाःसा सीएमसीयात हे लित हयाः ज्या याकेमाःगु अडानय् दी । तर तत्कालीन सचिव गजेन्द्र ठाकुरं उकी असहमति क्यनेवं ठाकुरयात सरुवा यानाः दिपेन्द्रनाथ शर्मायात हःगु खः । तर शर्मा नं सीएमसीयात लित हयेगु पक्षय् मदुगुलिं विवाद गन खः अन हे थानाच्वंगु दनि ।

मेलम्चीया ज्या क्वचायेकेत मन्त्रिपरिषदय् छ्वःगु प्रस्तावय् एसियाली विकास बैंक (एडीबी) व परामर्शदाता इप्टिसां बिउगु प्रतिवेदन नं दुथ्याःगु खँ मन्त्रालय सूत्रं धाःगु दु । परामर्श कम्पनी इप्टिसां झिगू प्याकेज दयेकाः ज्या न्ह्याकेत सुझाव बियातःगु दु । एडीबी व इप्टिसां तयार याःगु प्रतिवेदन कथं २ अर्ब ५० करोड तकाया ज्या ल्यं दनि ।

मेलम्चीइ आः हेडवक्स, भेन्टिलेशन, सुरुङ फिनिसिङ, गेट दयेकेगु आदि ज्या ल्यं दनि । एडीबी व परामर्श कम्पनीं छुं ज्या तप्यंक याके जिउगु, छुं ज्याया निंतिं बार्गेनिङ यायेमाःगु व छुं ज्यायात सार्वजनिक सुचं पिकयाः ठेक्का बीमाःगु प्रतिवेदन बियातःगु दु । एडीबीं वंगु मार्च ७ तारिखय् थःगु प्रतिवेदन बिउगु खःसा परामर्श कम्पनीं २१ तारिख कुन्हु मेलम्चीया ल्यं दनिगु ज्याया विस्तृत प्रतिवेदन बिउगु खः ।

मेखे मेलम्चीया ठेकेदार सीएमसीं सहायक ठेकेदारतय्त पुलेमानिगु ध्यबा छु यायेगु धइगु न्ह्यसः नं ब्वलंगु दु । सहायक ठेकेदार व सामान सप्लाई याना वयाच्वंपिंत सीएमसीं १ अर्ब ५० करोड तका पुलेमानि । उमिसं थ्व ध्यबा सरकारं पुलेमाः धासें मपुल धाःसा आयोजनाया थप ज्या न्ह्याके मबीगु ख्याच्वः नं बियाच्वंगु दु ।

सम्बन्धित बुखँ

LEAVE YOUR COMMENTS