बौद्ध परियत्ति शिक्षाया दीक्षान्त

येँ (नेपालभाषा टाइम्स)- येँया विश्व शान्ति बिहारय् बु.सं. २५६६ या ६० क्वःगु नेपाल बौद्ध परियति शिक्षाया दीक्षान्त समारोह छगू तःजिगु ज्याझ्व यासें क्वचाल । अखिल नेपाल भिक्षु महासंघया अध्यक्ष नापं नेपाल बौद्ध परियति शिक्षाया शिक्षाध्यक्ष भिक्षु धर्मशोभन महास्थविरया अध्यक्षताय् जूगु उगु ज्याझ्वलय् वसपोलपाखें पञ्च शिल बियाबिज्यासें परियति शिक्षाया विद्यार्थीपिंत परियति प्रतिज्ञा नं याकाबिज्याःगु खः ।

नेपाल बौद्ध परियति शिक्षाया केन्द्रीय परीक्षा नियन्त्रक भिक्षु बोधिज्ञान महास्थविरं वार्षिक प्रतिवेदन बियाबिज्याःगु झ्वलय् परियत्ति शिक्षाया लागि आर्थिक ग्वाहालि यानादीपिं येँ महानगरपालिका नापं उपासक–उपासिकापिंत साधुवाद बियाबिज्यात ।

ज्याझ्वलय् मूपाहां कथं झायादीम्ह शिक्षा, विज्ञान तथा प्रविधिमन्त्री अशोक राईं उत्कृष्ट बिद्यार्थीपिंत पुरस्कार व प्रमाणपत्र लःल्हानादिल । ज्याझ्वलय् नेपाःया लागि म्यानमारया राजदूत उ सै उ नापं दूतावासया पदाधिकारीपिं, अथेहे श्रीलंकाली राजदूतावासया प्रथम सचिव निलुशा दिमिनी नं उपस्थित जुयादीगु खः।

थुगुसी परियति शिक्षाया थीथी तगिंया २५२४ म्ह विद्यार्थीपिं उत्तीर्ण जूगु खः । उकी प्रशान्त देव शाक्य, निशा बज्राचार्य, सरस्वति महर्जन, नेग्मा शाक्य, समुन्द्र देवी ताम्राकार, रोजी बज्राचार्य, कोमल लक्ष्मी शाक्य, मधुप्रकाश ज्ञवाली, निर्मला ताम्राकार व पद्मा शाक्यपिंसं सद्धम्मकोविद उत्तीर्ण यानादिलसा ३० म्ह परीक्षार्थीपिंसं सद्धम्मपालक उपाधि उत्तिर्ण यानादीगु खः ।

बौद्ध परियति शिक्षा नेपाःया सुदूरपश्चिम प्रदेश बाहेक मेगु खुगू प्रदेशया २२ जिल्लाय् संचालन जुया वयाच्वंगु दु ।