आः अर्थमन्त्रीयात ज्ञापन

येँ – सरकारं भुखाचं पीडित जूपिं जनतायात २ प्रतिशत ब्याजं बी धाःगु पुनर्कर्जा निदँया निंतिं जक यायेगु कथं राष्ट्र बैंकया ऐन संशोधन जुइवं भुखाचं पीडित जनतां आः अर्थमन्त्री डा. युवराज खतिवडाया ज्ञापन पौ बीगु तयारी याःगु दु । वंगु आइतवाः भुखाचं पीडित जनतां राष्ट्र बैंकया गभर्नर चिरञ्जीवी नेपालयात ज्ञापन पौ लःल्हाःगु खः ।

उगु इलय्गभर्नर नेपालं भुखाचं पीडितया निंतिं सरकारं हे ऐन संशोधन याःगुलिं थःपिंसं छुं याये फइमखु धासें थुकिया निंतिं सरकार व सांसदतय्त नापलायेत सुझाव बियादीगु खः । गभर्नरया सुझाव लिपा भुखाचं पीडित जनता आः अर्थमन्त्रीयात हे नापलानाः थःपिनि समस्या कनेगु तयारीइ वंगु खः । थुकिया निंतिं भूकम्प पीडित समूह हे दयेकाः फेसबुक व भाइबरं प्रचार प्रसार यायेगु ज्या यानाच्वंगु दु ।

सरकारं न्हापा न्यादँनिसें झिदँया निंतिं भुखाचं पीडित जनतायात त्यासा बीगु धकाः वाणिज्य बैंकतय्त सर्कुलर याःगु खःसा आः राष्ट्र बैंकं मौखिक सर्कुलर यानाः पुनर्कर्जा निदँया निंतिं जक यायेत धाःगु खःसा थुकिया लिच्वः कथं न्हापा २५ हजार मासिक किस्ता पूसां गाःपिं भुखाय् पीडित जनतां आः मासिक ५० हजार पुलेमाःगु अवस्था वयेवं सरकार व बैंकत थःपिनिगु सम्पत्ति लिलाम यायेगु कुनियत ज्वनाः न्ह्याः वनाच्वंगु द्वपं पीडित जनतां बिउगु दु ।