प्यदँया दुने सीमास्तम्भ तइगु, नेपाः–भारत सीमाय् ५०० गः स्तम्भ तयेगु थाय् पत्ता लगे मजूनि
येँ – नेपाः व भारत दथुइ कायम जुयाच्वंगु सीमा विवाद समाधान यायेत आः थ्वहे वइगु प्यदँया दुने पूवंक हे सीमास्तम्भ तये सिधयेकेगु सहमति जूगु दु ।
थ्वहे सीमा विवाद समाधान यायेत थनिं प्यदँ न्ह्यः नेपाः व भारतया प्राविधिकत तयाः गठन याःगु कार्यदलया नकतिनि क्वचाःगु बैठकं आः वइगु प्यदँया दुने निगू देय्या सीमाय् सीमास्तम्भ तयेगु ज्या सम्पन्न यायेगु सहमति याःगु खः ।
नेपाः व भारतया सिमानाय् आः ८५५४ गू सीमास्तम्भ तयेगु ज्या ल्यं दनि । थुकी मध्ये ५०० गू सीमास्तम्भ गन तयेगु खः धकाः आः तक थाय् तकं तोके याये फुगु मदुनि । छगू इलय् थ्व थासय् सीमास्तम्भ तयातःगु खःसां लिपा बेपत्ता जूगु व आः माला स्वतं नं पत्ता लगे मजूगु खँ धाःगु दु । सीमास्तम्भ सम्बन्धी विवाद समाधान यायेत गठन याःगु कार्यदलं वंगु प्यदँया दुने १००० गू सीमास्तम्भ तयेगु ज्या धाःसा याःगु दु ।
आः वइगु मेगु प्यदँया दुने सीमास्तम्भ तयेगु ज्या पूवंका हे छ्वयेगु प्रतिवद्धता कार्यदलं प्वंकूगु दु । नेपाः व भारत दथुइ १८८० किलोमिटर ताःहाकःगु खुल्ला सीमा दु । थ्व थासय् न्हापा सीमास्तम्भ तयातःगु खःसां गुलिं स्थानीय मनूतय्सं तंका छ्वःगु खःसा गुलिं भारतीय सीमा सुरक्षा बलं ल्यहेँथनाः वांछ्वया बिउगु द्वपं नं बीगु याः । अथे हे आपालं सीमास्तम्भ सीमाय् लाःगु खुसिं धार हिलीबलय् लखय् डुबे जुयाः तनाच्वंगु खँ नं धाःगु दु ।
आः न्हूगु सीमास्तम्भ तयेगु लागिं खुसिया पुलांगु हे धारयात कायम यानाः ज्या न्ह्याकूगु खँ धाःगु दु । भारतीय पक्षं नेपाःया आपालं सीमास्तम्भ चान्हय् चान्हय् वयाः नेपाःपाखे सारे यायेगु ज्या याःगु द्वपं नं वयेगु याः । जनयुद्धया लिपा नेपाःया सशस्त्र प्रहरीयात सीमाया सुरक्षा यायेगु ज्याय् खटे यायेवं भारतीय सुरक्षाकर्मीतय्सं अथे यायेगु कम याःगु खः ।
२० द्वः विघा जग्गा उखेथुखे
नेपाः व भारतया सीमास्तम्भ उखे थुखे जुयाः निगुलिं देय्या करिब २० हजार विघा जग्गा थुखेया उखे व उखेया थुखे लानाच्वंगु दु । सीमाया कारणं नेपाःया आपालं स्थानीय जनताया बुँ समेत भारतपाखे लाः वंगु दु ।
वार्ताया झ्वलय् भारतय् लाःगु भूमि उखे हे कायम यायेगु सहमति यात धकाः आपालं थासय् सीमा अधिकारीतय्त स्थानीय जनतां ज्या तकं याके मबिउगु खः । नेपाःया सीमा अधिकारीत भारतलिसे मिले जुल धकाः नं स्थानीय जनतां द्वपं बिउगु जुयाः आः नं अज्याःगु विवाद वयेफुगु खँ धाःगु दु ।
LEAVE YOUR COMMENTS