कोरोना भाइरस : विश्वन्यंक ११७म्ह नेपाःमित सित, १३ हजार संक्रमित

येँ – विश्वन्यंक महामारी जुयाच्वंगु कोरोना भाइरस (कोभिड-१९)या संक्रमणया कारणं हलिंन्यंक च्वपिं १ सय १७म्ह नेपाःमित सीगु दु ।

गैरआवसीय नेपाली संघया स्वास्थ्य समितिं मुंकूगु तथ्यांक कथं थ्व हप्ताय् थप २१म्ह नेपाःमित सीगु दु । अथे थप जूगुलि संयुक्त अरब इमिरेट्सय् ९म्ह, साउदी अरबय् ५म्ह, बेलायतय् २म्ह, नेपालय् २म्ह व अमेरिका, कतार व कुवेतय् छम्ह-छम्ह सीगु दु ।

संघया तथ्यांक कथं दकलय् अप्व बेलायतय् ६५म्ह नेपालीतय् संक्रमणया कारण सीधुंकूगु दु । अथेहे संयुक्त अरब इमिरेट्सय् १८म्ह, संयुक्त राज्य अमेरिकाय् १६म्ह, साउदी अरबय् ७म्ह, नेपालय् ३म्ह व कतार, आयरल्याण्ड, जापान, टर्की, नेदरल्याण्ड, बहराइन, स्वीडेन, कतार, कुवेतय् छम्ह-छम्ह सीधुंकूगु दु ।

सीपि मध्ये ९५म्ह मिजंत व १९म्ह मिसात जूगु स्वास्थ्य समिति धाःगु दु । उकी मध्ये दकलय् अप्व ५० निसें ९०दँया ५३ प्रतिशत सीधुंकूगु दु । अथेहे २३ प्रतिशत ४० निसें ५०दँया दु । ४०दँ स्वयां कमयापिं १६ प्रतिशत दु । मेपिं ८ प्रतिशतया उमेर खुले मजूनी ।

अथेहे समितिया संयोजक डा. सञ्जीव सापकोटां नेपाः सहित विश्वन्यंक १३ हजार स्वयां अप्व गैरआवासीय नेपाःमित कोरोनापाखें संक्रमित जूगु दु । उकी मध्ये मध्यपूर्वय् ७२, अमेरिकाय् १४, युरोपय् १०, एशियाय् ५ प्रतिशत दु । अष्ट्रेलियाय् १ प्रतिशत स्वयां म्हाे दुसा अफ्रिकी देशय् आः तक नेपाःमितय्त कोरोनाया संक्रमण खनेमदुगु संघं धाःगु दु ।

अत्याधिक कोरोना प्रभावित देय्त मध्ये बेलायत व अमेरिकाय् वंगु वाया तुलनाय् थ्व वालय् संक्रमणया ल्याः म्हो जुयाच्वंगु व मध्यपूर्वया देशय् अप्वया जुयाच्वंगु दु । थ्व वालय् रुस, रोमनिया व भारतय् नेपाःमितय्त न्हूगु संक्रमण खनेदुगु दु ।