बुंगद्यःया रथ सालाच्वन, प्रहरीपाखें हस्तक्षेप

यल- ताः ई न्ह्यःवनिसें दिनाच्वंगु बुंगद्यःया रथ सालेगु ज्या आः न्ह्यानाच्वंगु दु । बुंगद्यःया जात्रा यायेमाः धकाः यलया पुच्वय् धर्ना बीतवःपिं स्थानीयतय्सं रथ सालाच्वंगु खः । थौं जात्रायाबारे निर्णय यायेत सरोकारवाला पक्षतय् मुँज्या च्वनेत्यंगुलिं जात्रा संचालन यायेमाः धकाः दबाव बीत स्थानीयत सुथंनिसें धर्ना च्वनाच्वंगु दु । छुं दिं लिपा हे मनमास क्यनीगु व मनमासया इलय् रथ सालेमज्यूगुलिं याकनं रथ जात्रा यायेत स्थानीयत धर्नाय् च्वनाच्वंगु खः ।

धर्ना च्वनाच्वंगु इलय् हे स्थानीयतय्सं रथ साःगु खः । स्थानीतय्सं बुंगद्यःया रथ सालेत्यंगु इलय् प्रहरीं हस्तक्षेप याःगु खः । तर लिपा स्थानीयत व प्रहरी दथुइ खँल्हाबंला जुइधुंकाः रथ सालेगु खःसा प्रहरीं हस्तक्षेप मयायेगु सहमति जूगु खः ।

बुंगद्यःया रथ सालेगु निंतिं साइत स्वयेमाःगु खःसां सरोकारवालातय्त दबाव बीगु निंतिं आः सांकेतिक रुपं जक रथ सालेगु ज्या जुयावंगु खः धकाः धाःगु दु । थाैं गुथि संस्थान, स्थानीय प्रशासन व सरोकारवाला पक्षया दथुइ मुँज्या च्वनाः जात्राया बारे निर्णय याइगु जूगु दु ।