बजाःभावं स्वनिगःया जात्रा न्ह्याकेत समस्या

येँ – स्वनिगःया जात्रा पर्व न्ह्याकेत हाथ्या वयाच्वंगु खँ धाःगु दु । म्हिगः मजिपाः लाखे व्यवस्थापन समितिं ग्वसाः ग्वःगु अन्तक्र्रिया ज्याझ्वलय् उगु खँ धाःगु खः । देशय् अप्वया वनाच्वंगु बजाःभाःया कारणं जात्रा पर्वयात निरन्तरता बीत थाकुयाच्वंगु खँ धाःगु दु ।

प्रतिनिधिसभा सदस्य जीवनराम श्रेष्ठं प्राचीन इलंनिसें पूर्वजं दयेका थकूगु थीथी कला, संस्कृतिं नेपाःया सभ्यताया विशिष्ट पहिचान कायम यानाच्वंगु दु धासें यँयाःया झ्वलय् जुइगु फुक्कं कथंया जात्राय् सरकारं लगानी अप्वयेकेमाःगु खँय् बः बियादिल ।

गुथि संस्थान सञ्चालक समितिया दुजः रामशरण डंगोलं जात्रा पर्वया संरक्षण यानाः उकियात निरन्तर न्ह्याकेत थापना जूगु गुथिया आपालं धइथें जग्गा रैकरय् परिणत जुयाः आम्दानीया स्रोत म्हो जुया वनाच्वंगुलिं समस्या ब्वलनाच्वंगु खँ कनादिल ।

थ्वहे झ्वलय् आर्थिक अभावया कारण क्यनाः थुगुसी यँयाःबलय् दश अवतार नं पूवंक मक्यँसें छुं छुं ब्व जक क्यनाः सिधयेकेगु धकाः ग्वसाः खलकं धया हःगु दु ।