न्यय्म्हेसित जक स्वस्थानी धलं दंके बीगु

सक्व (नेपालभाषा टाइम्स) – दँय्दय् सक्वया नारी खुसिइ जुइगु स्वस्थानीया धलं दनीगु व माधवनारायण मेला थुगुसी वइगु बिहिवाःनिसें न्ह्यायेत्यंगु दु। तर थुगुसी कोरोना भाइरस संक्रमणया जोखिम अप्वः दुगुलिं न्हूगु नियम दयेकाः स्वस्थानीया धलं दंकेगु तयारी माधवनारायण स्वस्थानी व्रत तथा शालीनदी सुधार समितिं याःगु दु। समितिया अध्यक्ष मिजेन्द्रकाजी श्रेष्ठं थुगुसी ५० म्हेसित जक धलं दंके बीगु खँ धयादीगु दु। अथेहे धलं दनेगु निंतिं २० निसें ५० दँ दुपिंत जक दुथ्याकेगु खँ नं वय्कलं धयादीगु दु ।

धलं दनेगु निंतिं थःगु नां दुथ्याकेगु ई थौं तक जक तयातःगु दु। समितिया अध्यक्ष श्रेष्ठं धलं दने मंदुपिंसं थःगु नां दुथ्याकेधुंकाः पिसिआर, एक्सरे रिपोर्ट नं दुथ्याकेमाः व थ्व रिपोर्ट स्वयेधुंकाः जक धलं दंके बीगु कि मबीगु धयागु समितिं निर्णय याइगु खँ कनादिल । न्हापा लिपा जूसा स्वसलं मल्याक मनूतय्सं धलं दनेगु याना वयाच्वंगु खःसा थुगुसी कोरोना संक्रमणया जोखिमया कारणं भौतिक दूरी कायम यानाः च्वनेमाःगुलिं न्यय्म्हेसित जक धलं दंकेगु व्यवस्था यायेत्यंगु खः ।

अथेहे धलं दनीपिनि सुरक्षाया निंतिं माधव नारायणया दर्शन यायेत नारी खुसिइ वइपिंत नं तापाकं जक दर्शन याकेगु खँ धाःगु दु। अथेहे दर्शन याः वइपिंत मास्क अनिवार्य यायेगु लिसें भौतिक दूरी कायम यायेगु निंतिं माःगु तयारी जुइधुंकूगु खँ नं वय्कलं धयादीगु दु। माधवनारायण दर्शन याःवःपिं भक्तजनतय्सं नारीखुसिइ म्वः ल्हुइगु नं याइगु जूगुलिं साब्वं, लः, स्यानिटाइजर व मास्क वितरण यायेगु व्यवस्था नं यानागु खँ अध्यक्ष क्षेत्रं कनादीगु दु ।

येँ जिल्ला प्रशान कार्यालयं नं भक्तजनतय्त छगू हे पुखुली म्वः ल्हुइके मबीत आदेश बिउगुलिं नं खुसिइ म्वःल्हुके मबिसे लःया व्यवस्था यायेत्यंगु खः ।