नवदुर्गाया खः म्येय् क्वःथल

येँ – ख्वपय् नवदुर्गा द्यःयात छानातःम्ह खः म्येय् क्वथलेगुया लिसें मोहनि नं क्वचाःगु दु । मोहनिया नवमिकुन्हु बहनि नवदुर्गा द्यःयात छानातःम्ह महिषासुर राक्षसया प्रतीक खः म्येययात नवदुर्गा द्यः छेँय् नं लिना यंकाः ब्रम्हायणीइ यंकूगु खः । ब्रम्हायणी द्यःयाथाय् खः म्येय् थ्यनेवं अन हे स्यानाः म्येय्या हि नवदुर्गा देवगणयात छायेगु ज्या जूगु खः ।

नवदुर्गा द्यःयात खःम्येँय्या हि छानाः मोहनि नं बिसर्जन याःगु खः । नवदुर्गा द्यःयाथासं ब्रम्हायणीइ यंकाः खः म्येय् स्यायेधुंकाः ब्रम्हायणी लगायतया थीथी देवदेवीयात छानाः ल्यं दुगु हि भैलः क्वंचाय् तयाः यंकूगु खः । वयां लिपा कतिंपुन्हिकुन्हु दक्वं देवगणयात हि छानाः मोहनि क्वचायेकूगु खः ।

थुकथं हे नःला स्वनेगु न्हिन्हकुन्हु छेँय्छेँय् पिनातःगु नःलास्वां नं खुसि चुइकाः मोहनि क्वचायेकूगु खः । मोहनिया दकलय् लिपांगु न्हि कतिंपुन्हिकुन्हु ख्वपया नांजाःगु नवदुर्गा द्यःया दर्शन यायेगु निंतिं आपालं भक्तजनत वःगु खः ।