ह्याउँम्ह किसिया देगः उलेज्या

येँ (नेपालभाषा टाइम्स) – येँ महानगरपालिकाया प्रमुख विद्यासुन्दर शाक्यं थनया येँ मनपा वडा नं. १८ किलागःस्थित ह्याउँम्ह किसिया देगःया उलेज्या यानादीगु दु । उगु देगः येँ मनपाया चालु आर्थिक दँया बजेटपाखें निर्माण सम्पन्न जूगु खः ।

देगःया उलेज्या यानादिसें येँ मनपा प्रमुख शाक्यं सम्पदा पुनःनिर्माण, मर्मत सम्भार, संरक्षण व अज्याःगु संरचना ल्यंकेत वःगु छुं नं मागयात थःपिंसं लित छ्वयेगु ज्या यानागु मदु धासें थुकिया निंतिं आवश्यक न्ह्याक्व नं खर्च यायेफु धयादिल । लिसें वय्कलं स्थानीय भाषा, कला, संस्कृति, साहित्य, सम्पदा, सिर्जनानापं सार्वजनिक महत्वया सम्पत्ति संरक्षण व संवद्र्धन यायेगु महानगरया दायित्व खः धासें सुनानं महानगरं छुं नं मयाः धकाः धाल धाःसा व भ्रमया खेती जक खः धयादिल ।

तुति सालेगु व लित्तुमतु लीगु प्रवृत्तिपाखें मुक्त जुइमाः धासें प्रमुख शाक्यं धयादिल, ‘गुथि परम्परा ल्यंकेगु दायित्व झीगु हे खः । उकिं संस्कार, संस्कृति व परम्परा ल्यंकेगु व थ्वलिसे सम्बन्धित अमूर्त कला ल्यंकेगु छुं नं कथंया योजना दुसा न्ह्याम्हेसिनं नं प्रस्ताव ज्वना वये फइ, जिमिसं ग्वाहालि यायेगु जुइ ।’

उगु इलये येँ मनपा १८ वडाअध्यक्ष न्हुछेकाजी महर्जनं येँ देय्या दुनेया थाय्बाय्या नां अपभ्रसं जुयाः थौंकन्हय् मेमेगु हे नामं म्हसीकेगु ज्या जुयाच्वंगु खँय् दुःख प्वंकादिल । वय्कलं धयादिल, ‘येँया दुनेया थाय्बाय्या नां अपभ्रसं जुयाः मेकथं हे उच्चारण यायेगु ज्या जुयाच्वंगुलिं सतक, चुक, ननि, लाछि, गल्लीया नांयात म्हसीकेत रञ्जना, खस व अंग्रेजी यानाः स्वंगू भासं तयेगु ज्या न्ह्याकागु दु ।’

२०७२ सालया भुखाचं क्षति जूगु देगः १३ गू लाख न्यय्द्वः तका दामं निर्माण सम्पन्न याःगु खः ।