कडा सुरक्षाया दथुइ राष्ट्रपति ख्वपय्

ख्वप – राष्ट्रपति विद्यादेवी भण्डारीं म्हिगः कतिंपुन्हि पुन्हु थनया नवदुर्गा द्यःछेँय् वयाः दर्शन यानादिल । २०४५ सालय् जुजु बीरेन्द्रं नवदुर्गा द्यःयाथाय् पुजा यायेगु परम्परा शुरु याःगु खः । उकियात गणतान्त्रिक राष्ट्रपतितय्सं नं निरन्तरता बिउगु खः । थ्व झ्वलय् राष्ट्रपति भण्डारी थुगुसी न्याक्वःखुसी नवदुर्गाया द्यः दर्शन यायेत ख्वपय् झाःगु खः ।

राष्ट्रपति सवारी जुइगु जुइवं न्हिनय् १ बजेनिसें लँ बन्द यानाः एम्बुलेन्स, दमकल व थीथी कथंया सवारी साधनत फुक्कं येँनिसें ख्वप तकं बन्द यानातःगु खः । निजी व सार्वजनिक सवारी साधनं लय् जुइपिं नापं सर्वसाधारणयात तक नं पनातःगु खः । सवारी चले जुइगु थासय् व नवदुर्गा द्यःयाथाय् कडा सुरक्षा ब्यवस्था याःगु खः ।

थुलि कडा सुरक्षा चिनियाँ राष्ट्रपति सी जिङपिनयात तकं मदुगु खँ मनूतय्सं धाःगु दु । द्यः गणयापिंत नं दुने हे कुनातःगु खः । पिने धाःसा थीथी सरकारी संघ संस्थाया प्रतिनिधित जक च्वने बिउगु खः । अन समाचार संकलनया लागिं वःपिं पत्रकारतय्त तकं दुमकाःगु खः।

प्रेस पास क्यनाः दुहाँ वनेत स्वःपिं पत्रकारतय्त तकं निघौ आसे धकाः पना बिउगु खःसा प्रेस पास क्यनाः न्ह्यःने वनेत्यंपिंत नं सुरक्षाकःमितय्सं लित छ्वया बिउगु खः । नवदुर्गा द्यःछेँय् राष्ट्रपति भण्डारीं नवदुर्गा गणया नायः बुलाल वनमालायात नापलानादीगु खः । वयां लिपा द्यः गणयात खाम सहित पुजा यानादीगु खः । वय्कः द्यः खिउँकाः तिनि द्यःथासं पिहां झाःगु खः ।

सम्बन्धित बुखँ

LEAVE YOUR COMMENTS