त्रिविपाखें दिनाच्वंगु परीक्षा न्ह्याकीगु

येँ (रासस) – त्रिभुवन विश्वविद्यालय (त्रिविं) लकडाउनया कारणं दिनाच्वंगु परीक्षा फुक्कं आः लकडाउन चालेवं न्ह्याकेगु तयारी याःगु दु। आः सेमेष्टर व वार्षिक प्रणलीया परीक्षा संचालनया तयारी यानाच्वनागु खँ त्रिवि परीक्षा नियनत्तण कार्यालय (पनिका)या परीक्षा नियन्त्रण पुष्पराज जोशीं कनादीगु दु ।

‘जिमिसं सेमेष्टरया परीक्षाया बारे खुला सफू स्वयाः च्वयेफइगु अनलाइन परीक्षा कायेगु बारे बिचाः यानागु खः’ वय्कलं धयादिल, ‘तर थ्व सम्भव मजुइगु खनेदुगुलिं परीक्षा हे कायेगु निर्णयय् थ्यंगु दु ।’

थ्वयां न्ह्यः सेमेस्टर प्रणाली अन्तर्गतया परीक्षा बारे निर्णय यायेत त्रिविया शिक्षाध्यक्ष प्रा.डा. शिवलाल भुसालया संयोजकत्वय् कार्यदल गठन यानाः परीक्षा मकायेगु तयारी याःगु खःसां आः सेमेष्टरया परीक्षा नं कायेगु जूगु खः । वय्कःया कथं मोहनि न्ह्यः हे दिनाच्वंगु फुक्कं सेमेष्टर व वार्षिक परीक्षा यायेगु तयारी जुयाच्वंगु दु ।

त्रिविं याकनं हे परीक्षा बारे सुचं पिकायेत्यंगु दु। थ्व पालय् विद्यार्थीतय्त अःपुइ कथं सतिक लाःगु क्याम्पसय् परीक्षा केन्द्र तयेगु खँ धाःगु दु। ‘न्हापा जूसा १२-१३ किलोमिटर दुने परीक्षा केन्द्र तयेगु यानाच्वनागु खः, थुगुसी धाःसा विद्यार्थीतय्त अःपुक सतिक सतिक परीक्षा केन्द्र तयेगु जुइ’ वय्कलं धयादीगु दु ।

लकडाउनया कारणं स्नातकोत्तर तहया १२ गू विषयया, कानून संकाय, मानविकी व व्यवस्थापनपाखे स्नातक तहया न्हापांगु दँया लिच्वः पिकाये ल्यं दनिगु खः । पनिकां फुक्कं लिच्वः पिकायेधुंकाः मेगु परीक्षा न्ह्याकेगु व थ्व परीक्षाया लिच्वः नं स्वला दुने पिकायेगु कथं तयारी यानाच्वंगु खँ परीक्षा नियन्त्रक जोशीं कनादीगु दु ।