स्वक्वःगु साहित्य नखः तःजिक क्वचाल

येँ – निन्हुयंकं न्ह्याःगु नेपालभाषा साहित्य नखः म्हिगः क्वचाल । नेपालभाषा टाइम्स या ग्वसालय् थुगुसी स्वक्वःगु साहित्य महोत्सव जूगु खः ।

शुक्रवाः येँ महानगरपालिकाया मेयर विद्यासुन्दर शाक्यं उलेज्या यासें न्ह्याःगु साहित्य महोत्सवया न्हापांगु न्हि मथुरा साय्मिया आत्मकथा सफू ‘साय्मि, जि मथुरा’, भूषणप्रसाद श्रेष्ठया गजल मुना ‘नुगःया गुनगुन’, राज साय्मिया जासुसी उपन्यास ‘तुयूगु अजः’, वासुदेव अधिकारीया नेपालभाषां अनुदित सफू ‘युरोस्पर्श’, उद्धव मास्केया नियात्रा सफू ‘छगू नन्द देशय्’ व राजेन्द्र कुमार पुताया गजलसम्बन्धी सफू ‘गजलया सिद्धान्त व नेपालभाषाया गजल’ व कविता सफू ‘सुथया लिसः’ समेत यानाः ७ गू सफू विमोचन जूगु खः ।

उगु सफूत येँ मनपाया मेयर शाक्य लिसें नेपालभाषा मंकाः खलःया नायः लिसें जनकवि दुर्गालाल श्रेष्ठ, नेपालभाषा एकेदेमिया चान्सलर चित्तरंजन नेपाली, किपू नगरपालिकाया मेयर रमेश महर्जन, नेवाः न्ह्यलुवा मल्ल के. सुन्दरपिंसं उलेज्या यानादीगु खःसा भाजु मल्लं विमोचित न्हय्गुलिं सफूया समीक्षा यानादीगु खः ।

ज्याझ्वलय् ‘रञ्जना लिपिया पुनरुत्थान’ विषयय् सहजकर्ता निर्मल वज्राचार्यं निरंजन तबः, आनन्द महर्जन, सुनिता डंगोल व सुयोग्य ताम्राकारलिसे अन्तक्र्रिया यानादीगु खः । लिसें थीथी साहित्यकारपिनि रचना पाठ व ख्यालः लिसें म्येँ न्ह्यब्वयेगु ज्या जूगु खः ।

ज्याझ्वःया निन्हुया न्हि वरिष्ठ साहित्यकार मथुरा साय्मिलिसे च्वमि राजेन मानन्धरं अन्तक्र्रिया यानादीगु खःसा ‘भाषा साहित्यया विकासय् संकिपाया भूमिका’ विषयक अन्तक्र्रियाय् सहजकर्ता राकेश महर्जनं फिल्मकर्मीपिं आर्यम नकःमि, विजयरत्न असंबरे, ओमचरण अमात्य व आशिष्मा नकःमिलिसे विचार मन्थन यानादीगु खः ।

लिसें निन्हुकुन्हु नं थीथी साहित्यकारपिंपाखें साहित्यिक रचना पाठ व ख्यालः लिसें म्येँ सहितया सांस्कृतिक ज्याझ्वः न्ह्यब्वःगु खः । उगु हे ज्याझ्वलय् नेपालभाषा टाइम्स चीहाः संकिपा कासाय् त्याःगु संकिपातय्त नवनियुक्त शहरी विकास राज्यमन्त्री रामवीर मानन्धरं दां सिरपाः लिसें सहभागी चीहाः संकिपातय्त दसिपौ लःल्हानादीगु खः ।

सम्बन्धित बुखँ

LEAVE YOUR COMMENTS