हलिउडय् स्टार जुइन्ह्यः

शुरुइ छुं मखुथें च्वंक पलाः न्ह्याकूम्ह मनू लिपा वनाः तःधंम्ह मनू जुयावलकि वयात ‘छुँ जुयाः वल, धुँ जुयाः क्यन’ धायेगु चलन दु । फिल्मया ख्यलय् नं अथे जुइगु याः । विशेष यानाः थन छुँ जुयाः फिल्मय् पलाः न्ह्याकूपिं कलाकार लिपा धुँ जुयाः क्यंगुयात कयाः चर्चा यायेगु कुतः जुइ ।

अर्थात शुरुशुरुइ छुं नं मू मदुगु रोलय् खनेदयेकः वःपिं गुलिखे कलाकारत लिपा वना टप स्टार जूगु दु । बलिउडया खँ ल्हायेगु खःसा छगू जमानाया नांजाःम्ह स्टार जितेन्द्रं्र म्हितूगु दकलय् न्हापांगु फिल्मय् वयात छगू चिकिचाधंगु जक रोल बिउगु खः । भी. शान्तारामया “सेहरा” नांयागु उगु फिल्म क्यनेत जितेन्द्रं छक थः मांयात ब्वना यंकल ।

अले पर्दाय् वयागु सिन वल धकाः मांयात क्यंगु ईतकया दुने व सिन क्वचाये धुंकल खनि । थ्व खनाः जितेन्द्रयात तसकं नुगः मछिन । मिखाय् ख्वबि जायावल । नेपालभाषाया न्हापांगु फिल्म “सिलु”या हिरो जय श्रेष्ठं नं वसिबें न्हापा “जुनी” नांयागु छगू फिल्मय् अज्याःगु हे छगू रोल याःगु दु ।

उलिजक मखसे लिपा “कान्छी” फिल्मय् मेन रोलय् डेब्यु याःम्ह शर्मिला मल्लं(उगु इलय् शाह) नं “जुनी” फिल्मय् अज्याःगु हे छगू मू मदूगु रोल म्हिते धुंकूगु खः । बलिउड व कलिउडय् जक मखु हलिउडय् नं अज्याःपिं स्टारत यक्व हे दु, गुम्हेसिनं न्हापा मू मदुगु रोलय् निं थःगु ख्वाः क्यनेमाःगु खः ।

अज्याःपिं स्टारत मध्ये छम्ह मार्लिन मुनरो नं खः । ग्ल्यामर क्वीनया दर्जा कायेत तकं ताःलाःम्ह मर्लिन मुनरों दकलय् न्हापां म्हितूगु फिल्म “स्कूडा हू ! स्कूडा हे !” खः । सन् १९४८ या थ्व फिल्मय् वयागु छगूयां छगू जक सिन दु । अले डायलगया नामय् “हाय् ¥याड ।” धकाः न्ववाये खंगु खः । शुरुइ थथे छुँ जुया दुहां वःम्ह मर्लिन मुनरो लिपा वनाः गुलि बय्बय् जुल धयागु खँ थन च्वयाच्वने माली मखु ।

ज्याकी चान धाल कि मार्शल आर्टया निंतिं नांजाःम्ह हलिउड स्टार धकाः याउँक हे म्हसी । तर थथे लोकंह्वाये न्ह्यः ज्याकी चानं “फिस्ट अफ फ्युरी” नांयागु फिल्मय् छुँ पह वःगु रोल म्हितूगु खँ आपाःसिनं सिउगु खइमखु ।

सन् १९७५ पाखे सुपर हिट जूगु हलिउड सिक्वेल ¥याम्बो व रकी फिल्मय् म्हिते न्ह्यः सिल्भर स्टायलोन नं छगू फिल्मय् अज्याःगु हे ज्यालगे मजूगु रोल म्हिते धुंकूम्ह कलाकार खः । वं १९७१ पाखे “बनानाज” नांयागु फिल्मय् छम्ह लुटाहा मनूया चिधंगु रोल म्हितूगु खः । थ्व फिल्मया डाइरेक्टर वुडि अलेन खः ।

हलिउड फिल्मबारे नुगः क्वसाःपिंसं ज्याकी चान धाल कि मार्शल आर्टया निंतिं नांजाःम्ह हलिउड स्टार धकाः याउँक हे म्हसी । तर थथे लोकंह्वाये न्ह्यः ज्याकी चानं “फिस्ट अफ फ्युरी” नांयागु फिल्मय् छुँ पह वःगु रोल म्हितूगु खँ आपाःसिनं सिउगु खइमखु । “फिस्ट अफ फ्युरी” धइगु कुंग्फु कलाय् ज्वःमदुम्ह स्टार ब्रुस लीया छगू च्वछायेबहगु फिल्म खः ।

अले उगु हे फिल्मय् ज्याकी चानं छगू चिकिचाधंगु रोल यानाः थःगु पलाः न्ह्याकूगु खः । एन्जेलिना जोलिया मिजं कथं बय्बय् जुयाच्वंम्ह ब्रायड पिट थौं वयाः हलिउडय् स्टारया दर्जा दुम्ह हिरो कथं कयातःगु दु । सन् १९८८ स पिदंगु “थेल्मा एण्ड लुइज” फिल्मं हलिउडय् हिरोकथं वयागु न्हाय् धस्वात ।

तर वसिबें न्ह्यः ब्रायड भाजुं निगू प्यंगू फिल्मय् मू मदुगु रोल याये धुंकूगु जुयाच्वन । अज्याःगु हे छगू फिल्मया नां “लेस दाय्न जिरो” खः । अले उगु फिल्मय् धाथें हे वयागु रोल धयागु नं शून्यति हे मू मदुगु रोल खः । “मिलियन डलर बेबी” थेंज्याःगु ओस्कार सिरपाः त्याकेत ताःलागु फिल्मया डाइरेक्टर क्लाइन्ट इस्टवुडयात काउब्वाइ फिल्मया निंतिं नांजाःम्ह स्टार धाइ ।

द गुड द बायड एण्ड द अग्ली, डर्टी हेरी थेंज्याःगु आपालं फिल्मय् काउब्वाय् जुयाः म्हितूम्ह हलिउड स्टार क्लीण्ट इस्टबुडं सन् १९५० या दशकय् गुलिखे फिल्मय् मू मदुगु रोल म्हितूगु दु । डाइ हार्ड स्विक्वेलया निंतिं नांजाम्ह एक्शन स्टार ब्रुश विलिसं नं थःगु क्यारीयरया शुरुइ मू मदुगु रोल याना वःम्ह खः ।

बु्रस विलिस ला उगु इलय् भीडभाडय् दनीम्ह एक्स्ट्रा कलाकार तकं जुयाः म्हितूगु खःसा लिपा फ्रायन्क सिनात्राया “द डेड्ली सिन” य् छगू सिनय् वयागु ख्वाः खनेदत । अनंलिपा सन् १९८२ पाखे पिदंगु “द भर्डिक्ट” नांयागु फिल्मय् पल न्यूमाय्न नांयाम्ह स्टारलिसे छगू सिन म्हितूगु खने दत ।

अनंलिपा तिनि वयात १९८८ पाखें पिदंगु “डाई हार्ड” फिल्मं हलिउडय् एक्शन स्टारया रुपय् न्ह्यने हःगु खः । सन् २००१ य् “होलिडे इन द सन” नांयागु फिल्मं हलिउडय् दुहां वःम्ह मेगान फक्स मय्जु ह्वाट आइ लाइक एबाउट यु व टु एण्ड ए हाफ मेन थेंज्याःगु फिल्मय् सपोर्टिंग रोल नं म्हितल ।

सपोर्टिंग रोल म्हिते धुंकूगु जूसां वय्कः मय्जुं “बायड ब्वाइज टु” नांयागु फिल्मय् एक्स्ट्रा जुयाः तकं ज्या यानाः थःगु यात्रायात न्ह्याके माःगु खँ थन लुमंकेबहजू । बेन अफ्लेक व मायट डेमन धइपिं मचां निसेंया पासापिं खः । थौंकन्हय्या हलिउडय् स्टार कथं कयातःपिं खः । तर स्टार जुइसिबें न्ह्यः इमिसं छुं छुं फिल्मय् ज्या लगे मजूगु रोल नं याःगु जुयाच्वन ।

उमिसं अज्यागु रोल याःगु छगू फिल्मया नां “फिल्ड अफ ड्रिम्स” खः । थुकी केभिन कोस्टनरया मेन रोल दु । क्लाइन्ट इस्टवुड थेंहेंतुं जोन वेन नं काउब्वाइ मुभिया निंतिं नांजाःम्ह हलिउड स्टार खः । थथे नांजाम्ह स्टार जुइ न्ह्यः नं जोन वेनं गुलिखे फिल्मय् मू मदुगु रोल याःगु खः ।

अज्याःगु फिल्मय् वय्कः भाजुं गबलें गार्ड जुयाः म्हितलसा गबलें सल ब्वाकेगु रेसकोर्सया अडियन्स जुयाः, अले गबलें फुटबल कासामि जुयाः म्हितेमाःगु खः । जेरी मेग्वायर, मेन अफ अनर अले रेडियो थेंज्याःगु फिल्म म्हितूम्ह क्युबा गुडिंग जुनियरयात झीसं इडी मर्फीया “कमिंग टु अमेरिका” फिल्मया छगू सिनय् सँ चाकीम्ह हजामया पसलय् फ्यतुनाच्वंगु खंकेफइ ।

थथे शुरुइ छुँ जुया दुहां वःम्ह लिपा धुँ जुइत ताःलाम्ह मेम्ह छम्ह हलिउड स्टार धइम्ह च्यानिंग टाटुम नं खः । म्याजिक माइक, ट्वेण्टि वन जम्प स्ट्रीट अले द भो थेंज्याःगु फिल्मया हिरो टाटुम भाजुं सन् २००५ या छगू तसकं बय्बय् जूगु “वार अफ दि वल्र्डस”य् चर्चय् सुम्क फ्यतुनाच्वंम्ह मिजंया मू मद‘‘गु रोल म्हितूगु खः ।

थुकथं स्वयेबलय् थ्व ख्यलय् थःगु पलाः क्वातुकेया निंतिं शुरुइ न्हापांगु पलाः छिइबलय् रोलया हाकः उलि महत्वपूर्ण मदु धइगु खनेदु । बरु थःम्हेसिनं यायेमाःगु कुतः गथे खः अथेहे सुथांलाकेगु हे जक मू आज्जु जुइमाः धइगु खनेदु ।

सम्बन्धित बुखँ

LEAVE YOUR COMMENTS