बलिउडया न्हूम्ह स्टार

बलिउड संकिपा ‘राजीं’ भारतीय बक्स अफिसय् १०० करोडया कमाई यायेत सफल जूगु दु । मिसायात प्रमुख पात्रया रुपय् वा भूमिकाय् प्रस्तुत यानातःगु संकिपाय् नायिका आलिया भट्टया मुख्य भूमिका दु । आलिया अभिनित संकिपां भारतया बक्स अफिसय् १०० करोडया कमाई यायेत सफल जुइवं वयागु ‘स्टारडम’ नं थहां वंगु दु ।

संकिपाया सफलतालिसें आः आलियायात बलिउडया न्हूम्ह स्टारया रुपय् कायेगु शुरु जूगु दु । राजी संकिपां प्रदर्शनय् वःगु स्वंगू हप्ताया दुने हे सय करोड कमे यायेत सफल जूगु खः । खय्तला आलियां म्हितूगु संकिपामध्ये १०० करोड पार याःगु थ्व न्हापांगु संकिपा धाःसा मखु । थ्व स्वयां न्ह्यः वं म्हितूगु ‘टू स्टेट’ व ‘बद्रीनाथकि दुल्हनिया’ नांया संकिपां नं १०० करोडया कमाई यायेत सफल जूगु दु ।

बलिउड संकिपा उद्योगय् १०० करोड कमे यायेत सफल नारी प्रधानय् आधारित थ्व निगूगु संकिपा खः । थ्व स्वयां न्ह्यः कंगना रनौटया भूमिका दुगु ‘तन्नु वेड्स मन्नु रिटर्नस’ नं थ्व आंकडा पार याःगु खः । राजी संकिपाय् नायिका आलियाया भूमिकायात स्वकुमिपिंसं जक मखु संकिया समीक्षकतय्सं नं तसकं ययेकूगु दु ।