सेलेनां इहिपा याइगु

हलिउडया चर्चित म्येँ हालामि व नायिका सेलेना गोमेजं इहिपा याइगु जूगु दु । २६ दँ दुम्ह सेलेनाया इहिपाया खँयात कयाः हलिउड फिल्म उद्योग व वया प्रशंसकतय् दथुइ छगू बिस्कं कथंया चर्चा परिचर्चा नं जुयाच्वंगु दु । हालय् जक कान्स फिल्म फेस्टिभलया ‘रेड कार्पेट’या छुं छुं किपा सामाजिक संजालय् सेयर यायेगु झ्वलय् सेलेनां क्याप्शनय् च्वःगु खः कि ‘६८ दँ दुम्ह नायक लिसें को स्टार बिल मुरेलिसें इहिपा यायेत्यनागु दु ।’

सेलेनां सामाजिक संजालय् किपानापं तयाः च्वयातःगु प्रतिक्रिया खनेवं वया प्रशंसकत अजू चाःगु दु । संजालया प्रयोगकर्तातय्सं सेलेनाया निर्णययात कयाः अनेकथंया न्ह्यसः तयेगु ज्या नं याःगु खः । सेलेनां संजालय् च्वःगु प्रतिक्रिया बांलाक ब्वनेगु खःसा वं च्वःगु प्रतिक्रियाया अर्थ मेगु खः ।

व छु धाःसां सेलेनां याकनं हे ‘द डेड डन्ट लाई’ नांया संकिपाय् अभिनेता बिल मुरेलिसे स्क्रिन सेयर यायेत्यनागु खँ च्वयातःगु खःसा उकिया नापनापं बिल मुरेप्रति आशक्ति व थःगु लगाव क्यनेगु झ्वलय् सेलेनां ‘अँ, छता खँ जि व बिल मुरे इहिपा यायेत्यनागु दु’ धकाः नं च्वःगु खः ।

कान्स फिल्म महोत्सवय् सेलेना व बिलया मुख्य अभिनय दइगु फिल्मया आपालं कलाकारतय् सहभागिता दुगु खः । व हे इलय् सलिनां अग्रज कलाकार बिललिसे स्क्रिन सेयर यायेगु बारे थःगु भावना नं प्वंकुसे उकथं प्रतिक्रिया च्वःगु खः ।