ब्रुमर संचालनय् वा व गाःया समस्या
येँ – येँ महानगरपालिकां महानगरया सतकय् धू मुनेगु निंतिं यान्त्रिक सवारी (ब्रुमर) संचालन याःगु न्याला स्वयां अप्वः दयेधुंकूगु दु । तर महानगरया सतकय् खास हे खने दइकथं छुं हिउपाः धाःसा वयाच्वंगु मदु । महानगरया सतकय् धू उतिकं हे खने दयाच्वंगु दुसा वा वइगु इलय् ध्याचलय् न्हुयाः वये वने यायेमाःगु महानगरवासीया बाध्यता जुयाच्वंगु दु ।
मनसुनया ई सिधयेधुंकाः अझं नियमित रुपं धइथें हे वा वयाच्वंगुलिं ब्रुमर संचालन यायेत समस्या जुयाच्वंगु येँ महानगरपालिकां न्ह्यथंगु दु । येँ मनपां महानगरया धू म्हो यायेगु ल्याखं ब्रुमर संचालनय् हःगु नं न्याला दयेधुंकल, महानगरया सतकय् च्वंगु धू धाःसा म्हो जुयाच्वंगु मदु ।
येँ महानगरपालिका वातावरण विभागयाकथं न्हियान्हिथं हे धइथें वा वयाच्वंगुलिं ब्रुमरं नं नियमित रुपं सतक सफा याये खनाच्वंगु मदु, गुकिं यानाः जनअपेक्षाकथं धू नं म्हो जूगु खने दयाच्वंगु मदु ।येँ मनपा वातावरण विभागया प्रमुख हरिकुमार श्रेष्ठया कथं छखे नियमित रुपं धइथें हे वा वयाच्वंगु दुसा मेखे लःया कारणं जुइगु ध्याचलं सफा यायेगु ज्याय् मेगु चुनौति थप जुयाच्वंगु दु ।
महानगर दुनेया सतकया मेगु समस्या धइगु सतकय् च्वंगु गाः खः । थ्व समस्या समाधान यायेगु निंतिं सडक विभागं छुं छुं थासय् च्वंगु सतकया गाः ल्हाकेगु ज्या याःसां नं आपालं थासय् धाःसा ज्या ल्यं हे दनि ।
न्हिं १० टन धू संकलन याना वयाच्वंगु न्हय्गः यान्त्रिक सवारी तुफि (ब्रुमरं) थ्व न्यालाया अवधि दुने महानगरया सतकं ५०० टन स्वयां अप्वः धू संकलन यायेधुंकूगु विभागया प्रमुख श्रेष्ठया धापू दु । ब्रुमरपाखें संकलन जूगु धू दक्वं टेकुइ व्यवस्थापन यायेगु यानाच्वनागु नं वय्कलं जानकारी बियादिल ।
येँ महानगरपालिकां सुन्दर, स्वच्छ व सफा सहर निर्माण यायेगु ज्याकथं अत्याधुनिक यन्त्रपाखें सतक सफा यायेगु ज्या न्ह्याकूसां नं नगरवासीं धाःसा उकथं सफा येँ देय्या अनुभूति याये खनाच्वंगु मदु । वंगु फागुन महिनाय् इटालीं हःगु न्यागः व वयां छुं ई लिपा हे चीन सरकारया ग्वाहालिं प्राप्त जूगु निगः यानाः न्हय्गः ब्रुमर संचालन जुयाच्वंसां नं येँ देय्या सतक धाःसा आशा याःकथं सुचुकुचु खने दयाच्वंगु मदु ।
न्हय्गलं ब्रुमर संचालनया निंतिं येँ मनपां न्यागू रुट क्वःछिउगु खः । व हे रुट कथं ज्या जुयाच्वंगु दुसां नं न्हियान्हिथं हे ज्या यायेगु वातावरण मदुगुलिं समस्या जुयाच्वंगु खँ धाःगु दु । प्रमुख श्रेष्ठया कथं येँ महानगर दुनेया सतकया मेगु समस्या धइगु सतकय् च्वंगु गाः खः । थ्व समस्या समाधान यायेगु निंतिं सडक विभागं छुं छुं थासय् च्वंगु सतकया गाः ल्हाकेगु ज्या याःसां नं आपालं थासय् धाःसा ज्या ल्यं हे दनि ।
गुकिया कारणं ब्रुमर संचालन यायेत समस्या जुयाच्वंगु दु । थनया न्हूसतक, रत्नपार्क, जमः, कालिमाति, कंलकी, पुतलीसतक, विजुलीबजाः लगायतया थासय् सतक आपालं गाः दुगुलिं महानगरं सडक विभागलिसें गाः ल्हाका बीत इनाप याःगु दु । थ्व स्वयां न्ह्यः विशिष्ट व्यक्ति वये वने याइगु इलय् सडक विभाग व येँ मनपां थवंथवय् समन्वय यानाः विभागयाके दुगु निगः ब्रुमरपाखें सतक सफा याना वयाच्वंगु खः ।
महानगपालिकायाके थ्व स्वयां न्ह्यः हे छगः ब्रुमर दुगु खःसां उकिं नं ज्या याये फइगु अवस्था धाःसा मदु । उगु यान्त्रिक तुफिं वा मवःगु इलय् न्हियान्हिथं बहनिसिया ८ ताःइलंनिसें सुथसिया ४ ताःईतक सतक सफा यायेगु व धू मुनेगु याना वयाच्वंगु दु । आः संचालन जुयाच्वंगु ब्रुमर १० करोड ८० गू लाख तकाय् हःगु खः ।
थुपिं ब्रुमरं न्हियान्हिथं १० किलोमिटरतकया धू संकलन यायेगु क्षमता दु । युरो मापदण्डया धयातःगु ब्रुमरया न्ह्यःने, दथुइ व लिउने जवंखवं यानाः प्लाष्टिकया प्यंगू ब्रुसलिसें धू सालेत शक्तिशाली पाइप जडान यानातःगु दु । सतकया थाय्थासय् गाः व भुखाचं यानाः दुनाच्वंगु संरचना पुनःनिर्माणया ज्या नं समस्या जुयाच्वंगु विभागं न्ह्यथंगु दु ।
मुख्य सतक लुँहितिस्थित, धरहरा, दरवार हाईस्कुल, रानीपुखू, काठमाडौं भ्यू टावर, बसपार्कय् थीथी थासं वइगु सवारी साधनं हःगु धू व ध्याचःया कारणं सफा यायेत नं उतिकं समस्या जुयाच्वंगु विभागं न्ह्यथंगु दु । कानूनी रुपय् ८ मिटर स्वयां म्हो ब्या दुगु सतक जक महानगरया जिम्माय् लाःसा मेगु सतक धाःसा सडक विभागया मातहतय् लानाच्वंगु दु ।
LEAVE YOUR COMMENTS