ने. सं. ११४४ ञलाथ्व दशमी -

अफगानिस्तान स्वतन्त्र मुलुक जूगु घोषणा

एजेन्सी- अमेरिकाया सेना नीदँ ताःहाकःगु युद्धया अन्त्य यानाः अफगानिस्तानं लिहां वंगु दु । अमेरिकी सेनाया अन्तिम डफ्फां सोमवाः स्थानीय ई कथं न्हिनसिया स्वताःत्या इलय् अफगानिस्तान त्वःतेवं अफगानिस्तानय् निगू दशक ताःहाकःगु युद्धया अन्त्य जूगु दु ।

तालिबानं अफगानिस्तानयात कब्जाय् कायेधुकाः अमेरिकां निवाःतक विदेशी नागरिकत व अफगान त्वःते चाहेजूपिं अफगानी नागरिकतय् उद्धार याःगु खः । थ्व झ्वलय् अमेरिकी सेनां छगू लाख २३ द्वः मनूतय्गु उद्धार याःगु खः । अमेरिकी राष्ट्रपति जो बाइडेनं छगू वक्तव्य पिकयाः अमेरिकी सेनां इलय् हे उद्धार ज्या क्वचायेकूगुलिं सुभाय् बिउगु दु ।

सन् २००१ य् अल कायदायात आक्रमण यायेत वंगु अमेरिकी सेना उबलय् निसें अफगानिस्तानय् च्वनाच्वंगु खः । अमेरिकायात नेटो अन्तर्गत दुगु थीथी अन्तर्राष्ट्रिय सेनां ग्वाहालि नं यानाच्वंगु खः । अफगानिस्तान युद्धय् अमेरिकाया यक्व हे ध्यबा खर्च जूगु खःसा नीप्यसः अमेरिकी सैनिक नं सीगु खः । अमेरिकी सेनां अफगानिस्तानय् बिन लादेनया लिसे यक्व हे अल कायदाया नेतातय्विरुद्ध कारबाही याःगु खः ।

अमेरिकी सेनां अफगानिस्तान त्वःतेवं तालिबानं काबुलय् च्वंगु अन्तर्राष्ट्रिय विमानस्थलयात कब्जाय् काःगु दु । अन्तर्राष्ट्रिय सञ्चार माध्यमया कथं तालिबानं मंगलवाः बहनिइ सर्गतय् ह्याउँक मत च्याकाः व मेसिनगनं हवाइ फायर यानाः लसता प्वंकूगु खः ।

तालिबानं अमेरिकी सेना लिहां वनेधुंकाः अफगानिस्तान स्वतन्त्र व सार्वभौम मुलुक जूगु घोषणा याःगु दु । तालिबानया प्रवक्ता जबिहुल्लाह मुजाहिदं अमेरिकी सेना लिहां वंगु ऐतिहासिक ई जूगु धाःगु दु । प्रवक्ता मुजाहिदं अमेरिकी सेना लिहां वंगुलिं तालिबान जक मखु, सकल अफगानी नागरिक विजयी जूगु धाःगु दु ।

प्रवक्ता मुजाहिंद अमेरिकी सेना अफगानिस्तानय् असफल जूगु दावी नं याःगु दु । अमेरिकाया पराजयं मेपिंसं नं शिक्षा कायेमाःगु प्रवक्ता मुजाहिंद धापू दु । प्रवक्ता मुजाहिदं सकल अफगानीतय्त भिंतुना धासें तालिबानं सहिष्णु व खुल्ला शासन याइ धाःगु खः । मुजाहिदं तालिबानं अमेरिकालिसे नं बांलाःगु स्वापु तइ धकाः नं धाःगु खः ।

तालिबानं अफगानिस्तान कब्जाय् कायेधुकां ईस्लामिक स्टेटं वंगु वालय् काबुल विमानस्थलय् १७० म्हेसिगु ज्यान वंक आत्मघाती हमला याःगु खः । अथे हे सोमवाः नं काबुल विमानस्थलयात लक्षित यानाः न्यागः रकेट प्रहार याःगु खःसां अमेरिकी सेनां थ्व आक्रमण धाःसा विफल यानाबिउगु खः । अमेरिकां विमानस्थलय् जूगु हमला लिपा निक्वः ड्रोन हमला याःगु दु । न्हापांगु ड्रोन हमलाय् अमेरिकां काबुल विमानस्थलय् विस्फोट याःम्ह योजनाकार सीगु धाःगु खःसा निक्वःगु ड्रोन हमलाय् गुम्ह सर्वसाधारण सीगु खः । थुखे रुसं काबुल विमानस्थलय् जूगु हमलाय् संलग्न मनूतय्त तालिबानं ज्वंगु धाःगु दु ।