ट्यांकर संचालन मयाःसा सम्झौता रद्द यायेगु ख्याच्वः
येँ – नेपाल आयल निगम (एनओसीं) तत्काल ट्यांकर संचालन मयात धाःसा ढुवानी सम्झौता रद्द यायेगु ख्याच्वः बिउगु दु । एनओसीं पेट्रोलियम पदार्थ ढुवानीकर्ता व ट्यांकर चालकं तत्काल ट्यांकर संचालन मयात धाःसा ढुवानी सम्झौता रद्द यायेगु ख्याच्वः बिउगु खः ।
एनओसीं छगू सुचं जारी यासें पेट्रोलियम पदार्थया आपूर्ति व्यवस्थाय् प्रतिकूल लिच्वः लाइकथं पिडिओ मकायेगु, भारतीय आयल निगम (आईओसी)इ इन्धन कायेत मवनेगु, डिपोय् इन्धन ज्वनाः मइगु व विक्री वितरणय् ग्वाहालि मयाइगु ट्यांकर व चालकयात कडा कारवाही यायेगु धयातःगु दु ।
आम जनजीवनय् प्रत्यक्ष रुपं लिच्वः लाकीगु व अत्यावश्यकीय पेट्रोलियम पदार्थया आपूर्ति सहज व सरल रुपं यायेत तत्काल थःथःगु क्षेत्रय् ट्यांकर संचालन यायेत नं सुचीत यानाच्वना धकाः एनओसीं जारी याःगु सुचनय् धयातःगु दु । निगमं पूर्णरुपं ट्यांकर संचालन यानाः पेट्रोलियम पदार्थ आपूर्ति सहज यायेत निगमं धाःगु दु ।
निगमलिसें इन्धन ढुवानीकर्ता व ट्यांकर चालक दथुइ छुं ई न्ह्यः जक छगू सम्झौता जूगु खः । सम्झौताकथं ट्यांकर संचालकं ल्ह्वना वयाच्वंगु तलब, भत्ता, संचय कोष, ट्रिप भत्ता लगायत सकता माग पूरा यायेगु व पेट्रोलियम पदार्थ नं नियमित रुपं आपूर्ति यानाः सरल व सहज यायेगु सहमति जूगु खः ।
सहमति जूसां ट्यांकर चालकतपाखें आपूर्ति असहज यायेगु कुतः जूगु धासें निगमं उकथं सुचं जारी यानाः सम्झौता रद्द यायेगु ख्याच्वः बिउगु खः ।वंगु मंगलवाःनिसें पेट्रोलियम पदार्थ ढुवानीकर्ता व ट्यांकर चालकतय्सं थीथी माग तयाः पेट्रोलियम पदार्थ ढुवानी यायेगु ज्या बन्द याना वयाच्वंगु खः ।
LEAVE YOUR COMMENTS