लिभरपुल जुल इंग्लिस च्याम्पियन

लन्डन (एजेन्सी) – लिभरपुल ३० दँ लिपा इंग्लिस च्याम्पियन जूगु दु । इंग्लिस प्रिमियर लिगय् बिहीवा: बहनि निगूगु थासय् च्वंगु म्यानचेस्टर सिटी चेल्सीपाखें २-१ पराजित जुइवं लिभरपुलं उपाधि त्याकिगु निश्चित जूगु ख: । चेल्सीया स्टायनफोर्ड ब्रिजय् जूगु कासाय् सिटी बुइवं लिभरपुलं लिग धलखय् २३ ल्या:या लिकाकेमफूगु अग्रता का:गु ख: ।

लिभरपुलं सन् १९८९-१९९० य् अन्तिम पटक लिग त्याकूगु ख: । उब्ले प्रिमियर लिग धा:सा सुरु मजुनि, पुलांगु न्हापांगु डिभिजनया लिग जुइगु ख: । सन् ७० व ८० या दशकया दकलय् सफल क्लब लिभरपुलं मुक्कं लिग त्याकूगु धा:सा थ्व १९ क्व:गु पालय् ख: ।

लिग त्या:गु निश्चित जुइवं लिभरपुलया व्यवस्थापक योर्गन क्लोपं क्लबया सफलता समर्थकतय् द्यछा:गु दु । वं धा:गु ख:, ‘लिभरपुलया थ्व उपाधिया सफलता सकलें समर्थकतय् समर्पित या:ना च्वना ।’