ससंफो सरकारय् वनी मखुत ?
एमाले–माओवादी एकीकरण लिपा जक बिचाः जुइ
येँ – प्रधानमन्त्री केपी ओलीया नेतृत्वय् न्ह्यानाच्वंगु वर्तमान सरकारय् संघीय समाजवादी फोरम व राजपा नं दुहां वनी धकाः जुयाच्वंगु चर्चा थौंकन्हय् अथें फासांफुसुं जूगु दु । खास यानाः ससंफोया अध्यक्ष उपेन्द्र यादव वर्तमान सरकारय् परराष्ट्र मन्त्री जुइगु धकाः तकं चर्चा जूगु खःसां आः वयाः थ्व चर्चा नं अथें सेले जूवंगु दु ।
सूत्रतय्सं धाः कथं थौं एमाले व माओवादी निगू पार्टी एकीकरणया तयारी जुयाच्वंगु कारणं ससंफोयात सरकारय् दुकायेगु बारे छुं हे खँ जुयाच्वंगु मदु । मेगु छगू सूत्रं धाःसा प्रधानमन्त्री केपी ओली अबले भारतया भ्रमणय् वनेगु तयारी जुयाच्वंगुलिं जक ससंफो व मधेसवादी दल धकाः चर्चित राजपायात नं सरकारय् दुकायेगु धकाः खँ पिहां वःगु खः ।
यदि राजपा व ससंफो नं सरकारय् दुहां वल धाःसा प्रम ओलीयात भारतय्वनेबलय् सहज अवस्था वइ धकाः वय्कलं अज्याःगु ‘गेम’ म्हितूगु चर्चा नं पिहांवःगु दु । उगु इलय् सरकारय् सु वनेगु धइगु खँय् ससंफो दुने आन्तरिक रुपं समस्या समेत पिहां वःगु खः ।
अथे हे छुं जुयाः एमाले व माओवादी एकीकरण जुइ मफुत धाःसा सरकार बचे यायेगु लागिं ससं्रफो व राजपाया जूसां साथ कायेमाः धकाः नं प्रम ओलीं अज्याःगु चाल म्हितूगु खँ नं चर्चाय् वःगु खः । आः एमाले व माओवादी एकीकरण मजूतले मेगु पार्टीयात सरकारय् दुत हयेगु बारे छुं हे खँ मजुइगु जानकारी नं सूत्रं बिउगु दु ।
बौद्ध सम्मेलन बारे जानकारी
येँ – रक्षामन्त्री ईश्वर पोखरेलं बुद्ध जन्मस्थल लुम्बिनीइ आः यायेत्यंगु अन्तर्राष्ट्रिय बौद्ध सम्मेलनया जानकारी कयादीगु दु । २५६२ क्वःगु बुद्धजयन्ती व अन्तर्राष्ट्रिय बौद्ध सम्मेलनया निंतिं नेपाली सेनां स्वद्वः मनू न्ह्यनीगु सभागृह व बुद्ध जयन्ती व अन्तर्राष्ट्रिय सम्मेलन यायेगु तयारीया जानकारी कायेत म्हिगः मन्त्री पोखरेल लुम्बिनी झाःगु खः ।
४ करोड तका खर्च यानाः नेपाली सेनां उगु सभागृह दयेकूगु खः । मन्त्री पोखरेल अन मायादेवी मन्दिरया अवलोकनया लिसें दर्शन नं याःगु खः । अथेहे वय्कलं बुद्ध जयन्ती व अन्तर्राष्ट्रिय सम्मेलनया झ्वलय् अनया सुरक्षा प्रबन्धयात कयाः नं जानकारी कयादीगु खः ।
लुम्बिनीइ जुइगु स्वन्हु यंकंया ज्याझ्वःया तयारी बारे मन्त्री पोखरेलयात प्रदेश नम्बर ५ या पर्यटन मन्त्री लीला गिरी व लुम्बिनी विकास कोषया निमित्त सदस्य सचिव इन्जिनीयर सरोज भट्टराई जानकारी याकादीगु खः । थ्वहे वैशाख १५ गते निसें १७ गते तक न्ह्याइगु सम्मेलनय् प्रमुख अतिथि कथं राष्ट्रपति विद्यादेवी भण्डारी झाइगु ज्याझ्वः दु ।
LEAVE YOUR COMMENTS