थौं सकलें सीपिनि अन्त्येष्टि, तिंख्यलय् अन्तिम श्रद्धांजलिया लागिं तइगु

येँ – म्हीग ताप्लेजुङय् जूगु हेलिकप्टर दुर्घटनाय् लानाः मदुपिं न्हय्म्हेसियां अन्त्येष्टि थौं याइगु जूगु दु । थ्व स्वयां न्ह्यः मदुपिं न्हय्म्हेसियां शवयात अन्तिम श्रद्धांजलिया लागिं थौं येँया तिंख्यलय् तयेगु खँ क्वःजिउगु दु । थौं सुथय् ८ निसें ११ बजे तक मदुपिंत अन्तिम श्रद्धांजलि प्वंकेगु ज्याझ्वः तयातःगु दु ।

मदुम्ह पर्यटन, नागरिक उड्डयन लिसें संस्कृति मन्त्री रविन्द्र अधिकारीया अन्त्येष्टि धाःसा थौं पोखराय् याइगु जूगु दु । दुर्घटनाय् लानाः मदुपिनिगु शव म्हिगः हे येँय् थ्यंके हःगु खःसां पोष्ट मार्टम यायेगु ज्याय् ताः ई कायेवं म्हिगः याये धयातःगु अन्तिम श्रद्धांजलिया ज्याझ्वः स्थगित यानाः थौंयात लिछ्याःगु खः ।

नेकपाया पार्टी महासचिव बिष्णुप्रसाद पौडेलं म्हिगः छगू वक्तव्य जारी यासें म्हिगःया ज्याझ्वः स्थगित जूगु व उगु ज्याझ्वः थौं सुथय् ८ बजे निसें ११ बजे तक तिंख्यलय् जुइगु जानकारी बियादीगु खः । लिसें म्हिगः याये धकाः क्वःछिनातःगु ज्याझ्वः इलय् मजूगुलिं नेकपां थुकी जूवंगु असुविधा प्रति क्षमा नं फ्वंगु दु ।

थौं जुइगु अन्तिम श्रद्धांजलि ज्याझ्वलय् राष्ट्रपति विद्यादेवी भण्डारीया लिसें प्रधानमन्त्री व देय्या थीथी नेतातय्सं ब्वति काइगु खँ धाःगु दु ।
अन्तिम श्रद्धांजलि ज्याझ्वलय् प्रधानमन्त्री केपी ओलीं मदुम्ह मन्त्री रविन्द्र अधिकारीयात राष्ट्रिय ध्वाँय् फायेकीगु ज्याझ्वः दु । अथे हे नेकपाया अध्यक्षपिं निम्हं केपी ओली व पुष्पकमल दाहालं मदुम्ह अधिकारीयात पार्टीया ध्वाँय् फायेकाः सम्मान याइगु नं ज्याझ्वः दु ।

तिंख्यलय् जुइगु अन्तिम श्रद्धांजलि लिपा मन्त्री अधिकारीया शवयात पोखरा यंकीसा मेपिनिगु शवयात उमि छेँजःपिंसं तिंख्यलं तुं बुझे यानाः यंकाः थःथःपिनि धार्मिक संस्कार कथं थःथःपिंसं हे अन्त्येष्टि याये यंकीगु खँ धाःगु दु । म्हिगः तिंख्यलय् अन्तिम श्रद्धांजलि बीगु निंतिं तयारी पूवनेधुंकूगु खःसा सीपिं फुकसियां पोष्ट मार्टम यायेगु ज्या लिबाःगुलिं ज्याझ्वः स्थगित यानाः थौं यायेगु क्वःछिउगु खः ।

थौं ११ बजे तक तिंख्यलय् तयाः अनं लिपा मदुम्ह मन्त्री अधिकारीया शवयात वय्कःया जन्मस्थान पोखराय् यंकाः अन हे राजकीय सम्मान सहित अन्त्येष्टी यायेगु तयारी जुयाच्वंगु दु । मेखे म्हिगः हे मन्त्री अधिकारी लिसें मदुपिनिगु सम्मानय् राष्ट्रिय शोक घोषणा यानाः बिदा बिउगु दु ।

अथे हे तुं म्हिगः नेकपा कम्युनिष्ट पार्टीया बैठक च्वनाः मन्त्री अधिकारीया लिसें यति एयरलाइन्सया अध्यक्ष आङछिरिङ शेर्पा, नेपाल नागरिक उड्डयन प्राधिकरणया उपमहानिर्देशक वीरेन्द्रप्रसाद श्रेष्ठ, निर्देशक ध्रुवदास भोछिभोय, प्रधानमन्त्री ज्याकूया उपसचिव युवराज दाहाल, पाइलट क्याप्टेन प्रभाकर केसी व मन्त्रीया सुरक्षाकर्मी अर्जुन घिमिरे मदुगुलिं बिचाः हायेकूगु दु ।

लिसें दुःखं कःपिं छेँजःपिंत समवेदन देछाःगु दु । अथेहे म्हिगःया बैठकया निर्णय कथं नेपाल कम्युनिष्ट पार्टी (नेकपां) पार्टीया केन्द्रीय ज्याकूनिसें देय्न्यंकंया ज्याकुथी बछि ध्वाँय् क्वछुकूगु दुसा स्वन्हु तक शोक पुस्तिका तयेगु निर्णय याःगु खः ।

अथेहे पार्टी केन्द्रीय ज्याकुथिं २३ गते श्रद्धांजलि बीगु ज्याझ्वः नं क्वःछिउगु दु । नेकपां दुर्घटनाय् लानाः मदुपिं छेँजःया आर्थिक अवस्था स्वयाः ग्वाहालि यायेत सरकारयात इनाप यायेगु निर्णय नं याःगु दु ।