संसफोया शंका, एमालेयात गय् पत्याः यायेगु ?

येँ – दुई तिहाइ बहुमत दुगु सरकार दयेकेगु लागिं संघीय समाजवादी फोरमया नं समर्थन कायेत एमालें ससफों न्ह्यःने तयाच्वंगु संविधान संशोधनया मागयात नं स्वीकार यायेगु बचं बिउगु दु । तर एमालें बचं बिउसां उकियात पूरा हे याइ धकाः गय् पत्याः यायेगु धइगु शंका धाःसा ससफो दुने ब्वलंगु दु ।

सूत्रतय्सं धाः कथं एमालें संविधान संशोधन याये धकाः बचं बिउसां वयात पत्याः याये फइगु आधार छु धकाः संसफो दुने आशंका ब्वलंगु दु । उकिं हथासं सरकारय् वने मजिउ धइगु धापू नं ससफो दुने बल्लाना वःगु दु ।

एमाले व संसफो दथुइ आः जुयाच्वंगु वार्ताय् ‘ससफों आन्दोलन मार्फत ल्ह्वना वयाच्वंगु संविधान सम्बन्धी मागयात संविधान संशोधन मार्फत व मेमेगु मुद्दायात नीति तथा कार्यक्रम मार्फत पूरा यायेगु’ धकाः च्वयातःगु भ्वँतय् सही यायेत एमाले तयार जुइधुंकूगु दु ।

छु छु खँय् संविधान संशोधन यायेगु ले धइगु खँय् धाःसा आः हे सामान्य समझदारी दयेका तयेमाः धकाः ससफों मेगु छगू प्रस्ताव न्ह्यःने तःगु दु – भविष्यय् प्रदेशत थपे यानाः वने माल धाःसा न्हय्गुलिं प्रदेशया स्वीकृति कायेमाःगु संवैधानिक प्रावधान खारेज यायेगु । एमालें थुकी नं भद्र सहमति क्यनेधुंकूगु दु तर थुकिया लिखत धाःसा दइ मखु । लिखत मदुगु खँ कन्हय् एमालें पूरा याइ धकाः गथे पत्याः यायेगु धइगु आशंका ससंफो दुने ब्वलंगु खः ।

एमाले व ससफो कार्यदल दथुइ म्हिगः अन्तिम वार्ता यायेगु खँ जूगु खःसां ससफो अध्यक्ष उपेन्द्र यादव म्हिगः येँय् थ्यंकः वये मफुगुलिं थौं ११ बजे हानं वार्ता याइगु जूगु दु । थौंया वार्ता लिपा सहमतिइ सही जुइफुगु खँ सूत्रं धाःगु दु ।

सरकारय् ससफोयात निगू मन्त्रालय बियाः प्रधानमन्त्री कार्यालय स्वयेगु यानाः मेम्ह छम्ह मन्त्री बी फुगु खँ नं सूत्रं धाःगु दु ।