उपसभामुखया राजीनामा सुयात
उपसभामुखया राजीनामा कायेत कानुनी पंगः
येँ – संघीय संसदया सभामुख कृष्णबहादुर महरां राजीनामा बीधुंकाः नेपाल कम्युनिष्ट पार्टीं आः हानं सभामुखय् हे थःपिनि दावी कायम यायेगु लागिं उपसभामुख शिवमाया तुम्बाहाम्फेयात राजीनामा बीकेत्यंगु दु । तर आः सभामुख हे मदुगु अवस्थाय् उपसभामुखं सुयात राजीनामा बीगु धइगु मेगु संवैधानिक समस्या पिहां वःगु दु ।
संवैधानिक व्यवस्था कथं उपसभामुखं सभामुखयात राजीनामा बीगु खः । अथे हे सभामुखं नं उपसभामुखयात हे राजीनामा बीगु खः । तर आः सभामुख हे मदयेधुंकाः उपसभामुखं सुयात राजीनामा बीगु धइगु जटिलता पिहां वःगु दु । प्वनाच्वंगु सभामुख पदय् उम्मेदवारी बीत नेकपायात संवैधानिक समस्या दु ।
अथे जुयाः उपसभामुख तुम्बाहाम्फेयात राजीनामा याकाः सभामुख थःगु पक्षय् तये माःगु खनेदु । नेकपां आः उपसभामुख समाजवादी पार्टीयात बीगु तयारी यानाच्वंगु खँ नं सूत्रं धाःगु दु । तर महरां सभामुख पदं राजीनामा बीधुंकाः उपसभामुख तुम्बाहाम्फे राजीनामा बी मजिउगु तर्क संविधानविदतय्सं बिया हःगु दु ।
पुलांम्ह सभामुख सुवास नेम्वाङं धाःसा सभामुख रिक्त जूसां नं पद रिक्त जुइ मखु धासें महरां सभामुख पदं जक राजीनामा बिउगु व संसदय् न्ह्याबलें नं सभामुखया पद दयाच्वनीगु खँ धयादीगु दु ।
तर संविधानविद्तय्सं धाःसा पदीय मनू मदयेधुंकाः पदया छुं अर्थ दइ मखु धासें उगु अधिकार स्वतः उपसभामुखया जूगुलिं उपसभामुखं राजीनामा सुयात बीगु धइगु बारे संविधान कथं स्पष्ट मजूगुलिं तुम्बाहाम्फेयात राजीनामा याकेगु ज्या संविधान कथं मिले मजूगु खँ धयाहःगु दु ।थ्वहे झ्वलय् नेकपां महरायात सभामुख पदं जक मखु सांसद पदं हे राजीनामा बीमाः समेत दबाब बियाहःगु खँ नं सीदुगु दु ।
भट्टराईया न्ह्यसः
समाजवादी पार्टीया अध्यक्ष लिसें पुलांम्ह प्रधानमन्त्री डा. बाबुराम भट्टराईं सभामुख कृष्णबहादुर महराया यौन दुव्र्यवहार प्रकरणबारे सामाजिक सञ्जालय् कडा टिप्पणी यानादीगु दु ।
छन्हु न्ह्यः जक महरायात यौन दुव्र्यवहारया द्वपं बिउम्ह मिसां नीप्यघौ लिपा हे बयान हिउगु धासें डा. भट्टराईं सत्ताशक्तिया आडय् ख्यानाः, ह्ययेकाः, खँ हीके बियाः ‘युटर्न’ यानाः थः बचे जुइत स्वःगु द्वपं बियादीगु दु ।
डा. भट्टराईनं राम–रावण द्वन्द्वय् सीतायात बलि बीगु ज्या गबले तक न्ह्याइ धासें मिसा मुक्ति व सांस्कृतिक क्रान्ति थुकथं हे जुइगु खःला धकाः न्ह्यसः नं थनादीगु दु ।
LEAVE YOUR COMMENTS