व्यंग्यचित्र ब्वज्याया निंतिं कार्यशाला

येँ – कार्टुनिष्ट क्लब अफ नेपालं व्यंग्यचित्र (क्यारिकेचर) या विधायात कयाः छुं दिं न्ह्यः छगू कार्यशाला गोष्ठि याःगु दु । क्लबं थ्व हे वइगु जेठ ३० निसें ३२ गतेतक स्वन्हुयंकं जू वनाच्वंगु व्यंग्यचित्र प्रदर्शनीयात ध्यानय् तयाः उगु कार्यशाला गोष्ठि याःगु खः । नेपाल ललितकला प्रज्ञा प्रतिष्ठान (नाफा)या ग्वसालय् जुइत्यंगु क्यारिकेचर ब्वज्याय् सहभागि जुइपिनिगु निंतिं क्लबं उगु गोष्ठिया ग्वसाः ग्वःगु खः ।

ज्याझ्वलय् नवासें प्रतिष्ठानया कुलपति कान्छाकुमार कर्माचार्यं व्यंग्यचित्र अर्थात क्यारिकेचरया विधायात नं कलाया मेमेगु विधायात थें प्राथमिकता बीगु निंतिं नाफां क्यारिकेचर कासा व ब्वज्याया ग्वसाः ग्वयेत्यनागु जानकारी बियादिल ।

‘व्यंग्यचित्र अर्थात क्यारिकेचर यायेगु अःपुगु ज्या मखु’ कुलपति कर्माचार्यं धयादिल, ‘उकिं थःगु व्यंग्यचित्रयात सही रुपय् मूल्यांकनय् लाकेत व्यंग्यचित्रया नियम थुइकाः जक दयेकेत इनाप दु ।’ नेपाःया व्यंग्यचित्रयात अन्तर्राष्ट्रियस्तय् तक थ्यंकेगु निंतिं कुतः यायेमाःगु खँय् नं वय्कलं बः बियादिल ।

ज्याझ्वलय् कलाकार कुलमान सिंह भण्डारीं भियतनाम युद्धया इलय् अमेरिकां याःगु आक्रमण विरुद्ध नीगूया दशकय् व्यंग्यचित्र दयेकाः चीनय् छ्वयागु लुमन्ति कनादिल । क्लबया पुलांम्ह अध्यक्ष केशवराज खनालं २००७ साल न्ह्यः तत्कालीन राणा शासनया अन्त्यया निंतिं चन्द्रमानसिं मास्कें न्हापांखुसी व्यंग्य चित्र दयेकादीगु जानकारी बियादिल ।

‘न्हापा न्हापा पत्रिकायात आकर्षक दयेकेगु निंतिं विदेशी कार्टुन चित्रया तकं प्रयोग यायेगु यानाच्वंगु इतिहासपाखें स्पष्ट जू’, वय्कलं धयादिल ।

न्हापा प्रविधिया अपाय्सकं विकास मजूगु इलय् व्यंग्य चित्र नं उलि प्राथमिकताय् मलाःगु खःसा आः प्रविधिया सहज जूसां आर्थिक कारणं थ्व ख्यःया गुलि विकास जुइमाःगु खः उलि जुइ मफयाच्वंगु वय्कःया धापू दु । क्लबया अध्यक्ष अविन श्रेष्ठं कार्टुन दयेकीपिं कार्टुनिष्टतय्सं कार्टुन च्वयेबलय् छु छु खँय् ध्यान बीमाः धइगु बारे जानकारी बियादीगु खः ।

सम्बन्धित बुखँ

LEAVE YOUR COMMENTS