बौद्धय् लामातय् ल्वापु

येँ – चिनियाँ लामा पक्षधर व बौद्ध घ्याङ गुथि दथुइ ल्वापु जूगु दु । खास्ति चैत्यय् ग्वसाः ग्वःगु क्षमापुजा व दीप प्रज्वलन ज्याझ्वः स्यंकेत वंपिं गुथिया समर्थक व पुजा ज्याझ्वः ग्वसाः ग्वःगु चिनियाँ लामा पक्ष दथुइ ल्वापु जुइवं बौद्ध क्षेत्रय् म्हिगः तनावया स्थिति ब्वलंगु खः ।
तनाव तच्वया वनेवं प्रहरी घटनास्थलय् थ्यंकः वंगु खः ।

प्रहरीया उपस्थितिइ अन पुजा यायेगु ज्या जूगु खःसा गुथिया समर्थकतय्सं पिने च्वनाः नाराबाजी याःगु खः । चिनियाँ लामां खास्ती चैत्यय् अनधिकृत रुपं ज्या याःगु धासें गुथिं उकियात कयाः विरोध याना वयाच्वंगु दु । भुखाचं क्षति जूगु खास्ती चैत्य पुनर्निर्माणया झ्वलय् चिनियाँ लामां पुरातात्विक सिद्धान्तया अःखः जुइक पुनर्निर्माण याःगु धासें विरोध याना वयाच्वंगु दु ।