एमालेया संकल्प यात्रायात पहिचानवादीया हाथ्या
येँ (नेपालभाषा टाइम्स)÷प्रदेश नम्बर १ (कोशी प्रदेश) य् पहिचान– वादीतय्सं एमालेया ज्याझ्वःयात पंगः थनेगु कथं बन्दया ज्याझ्वः घोषणा यायेगु तयारी यानाच्वंगु दु । एमालें वंगु मंसिर १४ गते निसें न्ह्याकूगु मध्यपहाडी संकल्प यात्रा १ नम्बर प्रदेशय् याके मबीगु नीति कथं बन्दया ज्याझ्वः घोषणा यायेत्यंगु खः । प्रदेश नम्बर १ पुनः नामाकरण संयुक्त संघर्ष समितिं बन्दया तयारी याःगु खः ।
संघर्ष समितिया संयोजक दकेन्द्र सिंह थेगिमं पहिचानवादीतय्सं कोशीया मध्यपहाडी क्षेत्र् मंसिर २५ गतेनिसें बन्द आह्वान यायेत्यनागु जानकारी बियादीगु दु । वय्कलं ‘नेपालभाषा टाइम्स’ लिसे खँ ल्हासें थःपिसं १ नम्बर प्रदेशया ८२ म्ह सांसद व संघीय संसदया स्वम्ह सांसदपिंत १ नम्बर प्रदेशय् निषेध यायेगु धासें बन्दया आह्वान यायेत्यनागु जानकारी बियादिल ।
वय्कलं थःपिंत हेपे यानाः जबरजस्ती ज्याझ्वः यायेत स्वल धाःसा उकिया प्रतिवाद यायेगु जुइ धासें धयादिल, ‘मध्यपहाडी लोकमार्गय् सु सु दुहां वइ छकः स्वये, पहिचान विरोधीत १ नम्बर प्रदेशय् दुहां वयेगु कुतः यात धाःसा उमित पनेगु जुइ ।’
१ नम्बर प्रदेशसभां कोशी नामाकरण पारित यायेगु झ्वलय् मतदान याःपिं ८२ म्ह प्रदेशसभाया सांसद व पहिचान विरुद्ध निरन्तर न्ववाना जूपिं स्वम्ह नेता एमालेया अध्यक्ष केपी शर्मा ओली, सचिव योगेश भट्टराई व मेम्ह नेता महेश बस्नेतया पनेगु ग्वसाः दुगु खँ नं वय्कलं कनादिल ।
एमालेया स्वम्ह नेता व प्रदेश सभाया सांसदपिं बाहेक वल धाःसा थःपिंसं ज्याझ्वः याके बीगु धासें वय्कलं पहिचान विरोधीयात धाःसा गुगुं नं कथं ज्याझ्वः याके मबीगु खँ नं धयादीगु दु ।
पहिचानवादीतय्सं एमालें ग्वसाः ग्वःगु अभियानयात लक्षित यासें ‘घुर्मी–चिवाभञ्ज्याङ जनजागरण अभियान’ न्ह्याकूगु खः धकाः द्वपं बिउगु दु । मेखे एमालें पश्चिमया झुलाघाटं संकल्प यात्रा न्ह्याकेधुंकूगु दु । एमालें न्ह्याकूगु यात्रा मंसिर २६ गते उदयपुरया घुर्मी थ्यनी ।
यदि एमालें याइगु यात्राया झ्वलय् १ नम्बर प्रदेशसभाया दुजःपिं व स्वम्ह नेतात उगु ज्याझ्वलय् थ्यन धाःसा अन गुगुं कथंया मुठभेड समेत जुइ फइगु सम्भावना दु । थ्व स्वयां न्ह्यः नं एमालेया अध्यक्ष केपी शर्मा ओलीया गाडीयात पहिचानवादीतय्सं लिनाछ्वःगु खःसा उकथं हे भट्टराईया गाडीयात नं लिनाछ्वयेगु ज्या पहिचानवादीतय्सं यायेधुंकूगु दु ।
LEAVE YOUR COMMENTS