बुंगद्यःया देगः दनेत सिँया समस्या

येँ – बुंगय् च्वंगु करुणामय बुंगद्यःया देगः पुनःनिर्माण यानाच्वंगु उपभोक्ता समिति थौंकन्हय् सिँ थिकेगु भावं न्यायेत बाध्य जुयाच्वंगु दु। बजारय्सिँ या अभाव जूगुलिं समितिं थिकेगु भावं न्याये मालाच्वंगु खः । कोभिड महामारीया कारणं देगः दनेत माःगु थीथी आकारया सिँ बजारय् काये मदुगु खँ समितिं धाःगु दु। सिँ न्याये मदुगुलिं छुं ई देगः दनेगु ज्या नं दिकेमाःगु खँ धाःगु दु ।

सिँ मिलय् दुगु सिँ दक्व हयाः ज्या न्ह्याकाच्वनागु खँ न्ह्यथँसें समितिया अध्यक्ष अमिर शाक्यं धयादिल, ‘देगः दनेत माःगु सिँ छक्वलं कायेगु मदयाः छगू टिपय् हये फइगु सिँ निक्वः स्वक्वः यानाः कायेमाःबलय् गाडी भाडा हे यक्व पुले मालाच्वंगु दु ।’

अथेहे सरकारी इन्जिनियरतय्सं देगलय् खपत जुइगु सिँया गुलि माली धकाः बांलाक जानकारी मबिउगुलिं नं थिकेक सिँ हयेमालाच्वंगु खँ वय्कलं धयादीगु दु ।  देगःया जाः गजू तक ७० फिट ४ इञ्च जुइगु व थुकी ६४ फिट ४ इञ्च तकया सिँया ज्या यायेमाः धयातःगु दु। तर आःतक २२ फिट सिँया जक ज्या जुयाच्वंगु खँ अध्यक्ष शाक्यं कनादिल ।

देगः दनेत माःगु कार्नेस व बाटु अप्पा दयेकेगु निंतिं अर्डर बीधुनागु खँ नं वय्कलं धयादिल । ‘न्हापा देगः दयेकातःबलय् ३३ ताजिया अप्पा छ्यलातःगु लूगु दु। थ्व निगू ताजिया अप्पा कायेगु मदुगुलिं दयेके हे बीमाःगु खः’ वय्कलं धयादिल । देगः पुनःर्निर्माणया ज्या छतँ क्वचायेधुंकूगु व अप्पां दनेगु ज्याः ७० प्रतिशत क्वचायेधुंकूगु खँ समितिं धाःगु दु ।

वि.सं. २०७२ सालया तःभुखाचं दुंगु थ्व देगः दनेगु निंतिं श्रीलंकाया सरकारं आर्थिक ग्वाहालि बीगु धाःगु खः । थ्व कथं ठेक्का बीगु ज्या नं जुइधुंकूगु खःसां ठेकेदारतय्सं परम्परागत कथं दयेकेगु ज्या मयायेवं ठेक्का खारज यानाः २०७७ असार २० गते क्षमा पुजा यानाः उपभोक्ता समितिमार्फत दयेके ज्या न्ह्याःगु खः । थ्यंमथ्यं १५०० दँ पुलांगु शिखरशैलीया थ्व देगः वइगु असार मसान्त तकया दुने क्वचायेकेगु लक्ष्य तयातःगु दु ।

सम्बन्धित बुखँ

LEAVE YOUR COMMENTS