ने. सं. ११४६ बछलाथ्व पञ्चमी - दयावीरसिं बुदिं

कन्हय् जनजाति महासंघया धर्ना

येँ – आदिवासी जनजाति महासंघं कन्हय् वैशाख २२ गते माइतिघर मण्डलाय् हानं धर्ना बीगु जूगु दु । महासंघपाखें घोषित ज्याझ्वः कथं थ्व धर्ना बीत्यंगु खः । सरकारं आदिवासी जनजातिया पर्व विदा क्वपाःगु, सतक विस्तार व फास्ट ट्राय्क निर्माणया नामय् स्वनिगःया आदिवासी नेवाःतय्गु छेँ–बुँ कब्जा यायेगु व उमित विस्थापित यायेत्यंगु विरुद्ध महासंघं आन्दोलन घोषणा याःगु खः ।

कन्हय् जुइगु धर्ना ज्याझ्वलय् ब्वति कायेगु लागिं नेवाःतय् थीथी खलः पुचःतय्त नं आह्वान यानातःगु दु । खास यानाः सडक विस्तार पीडित संघर्ष समितिपाखें कन्हय्या धर्ना ज्याझ्वलय् ब्वति कायेत सकसितं इनाप यानातःगु दु । महासंघं थ्वयां लिपा नं थःपिनि संघर्षया ज्याझ्वः निरन्तर न्ह्याकेगु जुइ धाःगु दु ।