छक्वलं प्यम्ह मचा बुइकल

येँ – काठमाडौं मेडिलक कलेज (केएमसी) य् म्हिगः छम्ह मिसां छक्वलं प्यम्ह मचा बुइकूगु दु । पिने जिल्लां येँय् हयाः अस्पताल भर्ना यानातःम्ह २७ दँया खगित्रा शाहीं म्हिगः अपरेशन यानाः प्यम्ह मचा बुइकूगु खः । बूपिं मस्त मध्य स्वम्ह काय खःसा छम्ह म्ह्याय् खः । मचा प्वाथय् दुगुयां च्याला लिपा अपरेशन यानाः म्हिगः जन्म याःगु खः ।

बूपिं मस्तय् स्वास्थ्य अवस्था सामान्य दुसां छम्ह मचाया स्वास्थ्य धाःसा अस्थिर जुयाच्वंगु खँ अस्पतालं धाःगु दु । केएमसीया प्रसूति तथा मिसा ल्वय् विशेषज्ञ डा. चन्दा कार्कीं सामान्य तरिकां थथे छक्वलं प्यम्ह मचा प्वाथय् दइगु धइगु तसकं दुर्लभ घटना धयादीगु दु । टेष्ट ट्यूब प्रणालीपाखें मचा बुइ–बलय् प्वाथय् छक्वलं स्वम्ह प्यम्ह मचा लाइगु सम्भावना दु ।

तर सामान्य कथं गर्भय् छक्वलं प्यम्ह मचा लाइगु धाःसा दुर्लभ घटना जूगु खँ धाःगु दु । म्हिगः बुइकूपिं थ्व मस्त ३४ हप्ता जक प्वाथय् तयाः जन्मे याःगु जूगुलिं उमित सासः ल्हायेत छुं भचा समस्या वये फुगु जूगुलिं छुं हप्ता विशेष निगरानीइ तये मालीगु खँ धाःगु दु । प्वाथय् प्यम्ह मछि मचा लानाच्वंगु कारणं खगित्रायात तसकं मछिंगुलिं ई मत्यःनिवं अपरेश यानाः मचा बुइकूगु खः ।

प्यम्ह मछि मचा पूर्ण काल तक गर्भय् तयेगु सम्भव मदुगु तर ३४ हप्ता मदुवं मचा बुइकल धाःसा खतरा जुइगु जुयाः बल्ल बल्ल ३४ हप्ता क्यनेवं हे अपरेशन यानाः मचा बुइकूगु खः । वंगु वालय् शाहीया न्यासि जुइत व नये त्वने यायेत तकं थाकुया वःगु खः । शाहीया प्वाथय् प्यम्ह मचा दुगु खँ सी दयेवं वय्कःयात अस्पताल भर्ना याःगु खः । अस्पतालय् नं विशेष निगरानीइ तयाः वय्कःया उपचार जुयाच्वंगु खः । (बीबीसी)