बुंगद्यःया ‘न्हय्गां जात्रा’ क्वचाल, आइतवाः भोटोजात्रा

यल (नेपालभाषा टाइम्स)- बुंगद्यःया जावलायाः न्याःगु दु । थनया थति त्वालय् तयातःगु बुंगद्यःया रथयात म्हिगः सालाः जावलाख्यलय् थ्यंकूगु खः । बुंगद्यः सालेगु निंतिं म्हिगः स्वनिगःया दक्षिणभेग स्थित किपू, थानकोट लिसें न्हय्गांयापिं मनूत बाजं सहित मुनाः वःगु खः ।

द्यः साः वनेगु निंतिं थुगुसी न्हय्गां जात्रा मूल व्यवस्थापन समितिं न्हय्गांयापिंत द्यः साःवनेत इनाप यानाः सुचं हे पिथंगु खः । जावलायाःयात न्हय्गां जात्रा, किपू जात्रा नं धायेगु याः । थतिं जावलाख्यःतक द्यः सालेगु निंतिं न्हापांनिसें थनयापिं वनाः सालेगु परम्परा दु । चन्द्रागिरी नगरपालिकाया मेयर घनश्याम गिरीं बाजंसहित वनाः द्यः साः वनेगु खँ धयादीगु खः ।

बुंगद्यःया जात्रा सुरु पूच्वं जूसां थुकुन्हु पूच्वय् हे च्वंपिंसं धाःसा उकुन्हु थःपिनिगु जात्रा कथं काइमखु । पूच्वयापिंसं नं जावलायाःबलय् जक थःपिनिगु जात्रा कथं कयाः थुकुन्हु नखत्या सःतेगु याइ । पूच्वय् च्वंपिं न्हापा किपू व न्हय्गामं वयाः च्वंवःपिं जूगुलिं उमिसं नं बुंगद्यःया जात्रा जावलायाः कुन्हु जक हनीगु खः ।

जावलायाः न्याःगु प्यन्हु लिपा जुइगु भोटो जात्राया किवंदन्तीलिसे किपूया स्वापू दुगु कारणं नं जावलाख्यलय् द्यः सालीबलय् थनयापिं वनीगु चलन दुगु खः । बुंगद्यः याःन्याःगु प्यन्हु लिपा जुइगु भोटो जात्राय् क्यनीगु प्वाकलं किपू टौदहलय् च्वनीम्ह कर्कोट नागराजं किपूया ज्यापुयात बियाहःगु खः धयागु किंवदन्ती दु ।

स्वनिगःया हे दकलय् पुलांगु व दकलय् ताःहाकःगु जात्रा धाइगु बुंगद्यःया जात्राया झ्वलय् थुगुसी बुंगद्यः थतिइ थ्यंगु थ्यंमथ्यं निलात्या लिपा जक जावलाख्यलय् यंकूगु खः । म्हिगः याः न्याःगु जुयाः आः थ्वहे आइतवाः भोटो क्यनीगु जूगु दु ।

सम्बन्धित बुखँ

LEAVE YOUR COMMENTS