सुरज आर्केडया बेसमेन्टय् नं पार्किङ

येँ (नेपालभाषा टाइम्स)- येँ महानगरपालिका २४ वडाया मखं त्वालय् च्वंगु सुरज आर्केडया बेसमेन्ट खालि याकेगु ज्या जूगु दु । छुं ई न्ह्यःतक व्यावसायिक प्रयोजनय् वयाच्वंगु आर्केडया बेसमेन्ट खाली याकूगु खः ।

महानगरं स्वीकृत याःगु नक्सा व लिपांगु इलय् उकिया प्रयोजन वा उपयोगया अवस्थायात कयाः अनुगमन लिपा आर्केड व्यवस्थापन समितिं बेसमेन्ट खाली यानाः पार्किङ प्रयोजनय् रुपान्तरण याःगु खः । आर्केडया बेसमेन्ट खाली यानाः पार्किङ प्रयोजनया निंतिं तयार यायेवं आः उगु थासय् छक्वलं स्वसलं मल्याक मोटरसाइकल पार्किङ याये फइगु जूगु दु ।

येँ महानगरपालिकां वंगु साउन २ गते छगू सार्वजनिक सुचं जारी यासें छगू प्रयोजनया निंतिं नक्सा स्वीकृत यानाः मेगु हे प्रयोजनया निंतिं उपयोग यानातःगु बेसमेन्ट, सेमी बेसमेन्ट, गोदाम, स्वीकृत भवनया तल्ला नक्सा बमोजिम हे संचालन व उपयोगय् हयेत इनाप याःगु खः । महानगरं जारी याःगु ३५ न्हुया सुचंया अवधि सिधयेवं भदौ ६ गतेनिसें अज्याःगु थाय् खाली याकेगु अभियानकथं कारवाही प्रक्रियायात तीव्रता बियाहःगु खः ।

उगु इलय् महानगरं याःगु अनुगमन लिपा थनया लुँहितिइ च्वंगु काठमाडौं मल, खिचापुखुलिइ च्वंगु आरबी कम्प्लेक्स, दरवार मार्गय् च्वंगु लन्दन, पब व दरवार मलया भूमिगत तल्ला, न्हू बानेश्वर, कलंकी, त्रिपुरेश्वर लगायत आपालं थासय् च्वंगु बेसमेन्टय् जुयाच्वंगु व्यावसायिक प्रयोजनयात चिइकाः पार्किङया निंतिं खुल्ला याःगु खः ।

थुकथं हे मापदण्ड अःखः निर्माण यानातःगु अनधिकृत संरचना, सेडब्याकयात नं चिइकेगु क्रमयात महानगरं निरन्तरता बिउगु खः ।
मखनय् च्वंगु आर्केडया बेसमेन्ट खाली यानाः पार्किङया प्रयोजनय् हयेवं आः न्हूसतक, वंघः थेंज्याःगु थासय् न्ह्यागु इलय् नं जुयाच्वनीगु सवारीया चाप म्हो जुइगु व यातायात व्यवस्थापनय् ग्वाहालि जुइगु विश्वास याःगु दु ।