निन्हुया दुने २० हजार टिकट बुकिङ्ग

येँ – मोहनिया निंतिं स्वनिगलं पिहां वनेगु निंतिं ग्वंगःबुइ च्वंगु न्हूगु बसपार्कय् बसया टिकट काइपिनि भीड जुयाच्वंगु दु । आइतवाः निसें अग्रिम टिकट बुकिङ्ग खुल्ला यायेवं बसपार्कय् टिकट काइपिं चान्हय् निसें लाइन च्वं वयेगु जुयाच्वंगु दु । न्हूगु बसपार्कया व्यवस्था जिम्मा कयातःगु ल्होत्से बहुउद्देश्यीय प्रालिया महाप्रबन्धक सुनिल कुँवरं आइतवाः व सोमवाः निन्हु दुने २० हजारम्हेसिनं बसया टिकट कायेधुंकूगु खँ धयादीगु दु ।

पृथ्वी राजमार्ग जुयाः वनीगु गोरखा, पोखरा, लमजुङ्ग, बाग्लुङ्गयानिंतिं धाःसा असोज १० गते निसें जक बुकिङ्ग सुरु

कुँवरया कथं आइतवाः १४ हजार व सोमवाः ६ हजार टिकट बुकिङ्ग जूगु खः । यातायात व्यवस्था विभाग, महानगरीय ट्राफिक प्रहरी महाशाखा व नेपाल यातायात व्यवसायी राष्ट्रिय महासंघ दथुइ वंगु भदौ २६ गते जूगु निर्णय कथं वंगु असोज ५ गते आइतवाः निसें ताःहाकः दूरीया निंतिं अग्रीम बुकिङ्ग सुरु याःगु खः ।

सहमति कथं पृथ्वी राजमार्ग जुयाः वनीगु गोरखा, पोखरा, लमजुङ्ग, बाग्लुङ्गयानिंतिं धाःसा असोज १० गते निसें जक बुकिङ्ग सुरु जुइ ।
मोहनिया झ्वलय् स्वनिगलं लखौं मनूत गामय् वनीगु जुयाच्वंगु दु । थुगुसी २५ लाखं मल्याक मनूत सतक सञ्जाल जुयाः पिहां वनी धासें थःपिंसं थुकिया निंतिं बांलाःगु व्यवस्था यानाच्वनागु खँ यातायात महासंघया महासचिव सरोज सिटौलां धयादीगु दु ।