कोरानां मोहनि नखः नं प्रभावित

व्यापार याये मखनाः व्यवसायीत चिन्तित

येँ – कोरोना महामारीया कारणं लागू यानातःगु लकडाउनं यानाः आः न्ह्यःने वयाच्वंगु तःधंगु नखः मोहनि समेत प्रभावित जुइगु सम्भावना अप्वया वःगु दु । लकडाउन लागू हे जुयाच्वन धाःसा मोहनिया इलय् जुइमाःगु व्यापार व्यवसाय ठप्प जुइगु ग्याःचिकुं व्यापारीत चिन्तित जुयाच्वंगु दु ।

दँय्दसं मोहनिबलय् बजाः गुलजार जुयाः व्यवसाय चले जुइगु खः । थुगुसी कोरोनां यानाः वसःतासः, नसात्वँसा आदिया व्यापार ठप्प जुइगु सम्भावना अप्वःगु दु । मोहनिया व्यापार याये मखन धाःसा उकिया लिच्वः दछियंकं हे जुइगु जुयाः मोहनिया इलय् छुं भचा जूसां व्यापार याये दःसा जिउ धइगु बिचाः व्यवसायीतय्सं तयाच्वंगु खँ सीदुगु दु ।

अथे हे मोहनिया इलय् स्वनिगःया आपालं मनूत गामय् लिहां वनीगु जुयाः यातायात व्यवसायीतय् लागिं नं थ्व छगू व्यापारया तःधंगु अवसर जुयाच्वंगु खः । तर लकडाउनं यानाः छगू थासं मेगु थासय् वनेगु तकं बन्द यानातःगुलिं दँय् छकः मालामाल जुइगु यातायात व्यवसाय नं थुगुसी ठप्प जुइगु जूगु दु ।

व्यवसायीतय्सं धाः कथं मोहनिया इलय् छकः बांलाक व्यापार याये खन धाःसा दछि तक जुयाच्वंगु द्यापं तकं परिपूर्ति यायेफु । तर थुगुसी थ्व सम्भावना मदइगु जूगु दु ।

व्यवसायीतय्सं मोहनिया इलय् व्यापार व्यवसाय सञ्चालन याये जीक लकडाउन छुं भचा छ्वासुकेत इनाप यानाच्वंगु दुसां स्वास्थ्यकर्मीतय्सं धाःसा मोहनिया बजाः खुले जुल धाःसा भीडया कारणं कोरोना झन न्यना वनीगु खतरा जूगुलिं मोहनिया इलय् नं बजाः चायेके मजिउगु सुझाव बियाच्वंगु दु । व्यवसायीतय्सं धाःसा न्हिं छुं घौ जक छुट बियाः जूसां पसः चायेके बीमाःगु माग यानाच्वंगु दु ।
मेखे छुं व्यापारीतय्सं धाःसा थौंकन्हय् पिने देशं वयेमाःगु सामान नं छुं हे दुहां मवयाच्वंगुलिं बजाः खुले जूसां खास हे व्यापार जुइगु सम्भावना मदुगु खँ धयाच्वंगु दु । बजाः चाल धाःसां पुलांगु स्टक सामान जक मी मालीगु खँ धाःगु दु ।

छुं जुयाः मोहनिया इलय् पुलांगु स्टकया सामान मी फत धाःसा वयां लिपा गुलिखे पसल्यातय्सं पसः हे त्वःता वनीगु तकं सम्भावना दुगु खँ नं व्यवसायीतय्सं धाःगु दु ।

सम्बन्धित बुखँ

LEAVE YOUR COMMENTS