फर्म दर्ता व नवीकरणया ज्या शुरु

येँ – सरकारं फर्म दर्ता व नवीकरणया ज्या हाकनं संचालनय् हःगु दु। लकडाउनया अवधि दुने बन्द जुयाच्वंगु फर्म दर्ता व नवीकरण लगायतया ज्या हाकनं संचालनय् हःगु खः ।

वाणिज्य, आपूर्ति तथा उपभोक्ता संरक्षण विभागं लकडाउन अवधिइ बन्द जुयाच्वंगु उगु ज्यायात लकडाउन छ्वासुकूगु न्हिकुन्हुनिसें हे हाकनं संचालनय् हःगु खः ।

विभागं वंगु असार १ गतेनिसें हे फर्म दर्ता, नवीकरण, संशोधन, नामासारी, खारेजी लगायत दिनाच्वंगु सकतां ज्या संचालनय् हःगु खः । विभागं लकडाउनया इलय् अवरुद्ध जूगु ज्या सुचारु यायेत आवश्यक सकतां भ्वं ईमेल मार्फत छ्वया हयेत नं व्यवसायीतय्त इनाप याःगु दु। चिचिधंगु ज्याया निंतिं नं ज्याकुथिइ वयाच्वने म्वाय्क धकाः विभागं ईमेलपाखें आवश्यक भ्वं छ्वया हयेगु व्यवस्था याःगु खः ।

विभागया सूचना अधिकारी रवीन्द्र आचार्यं सोमवाःनिसें हे ज्याकू संचालन यानाः दक्वं शाखापाखें थीथी दिनय् खुल्ला जुइकथं ज्याया जिम्मेवारी बाँडफाँड यानागु कनादिल ।

विभागं प्रत्येक वाःया आइतवाः, मंगलवाः, शुक्रवाः ६० गू लाख स्वयां म्हो पूँजी दुगु निजी फर्म नवीकरण, संशोधन, प्रतिलिपि व खारेजी, सोमवाः न्हूगु दर्ता, बुधवाः ६० गू लाखं च्वय्या पूँजी दुगु फर्म नवीकरण संशोधन, प्रतिलिपि व खारेजी व विहीवाः साझेदारी फर्म दर्ता, नवीकरण, एजेन्सी दर्ता, नवीकरण लगायतया सेवा बिया वयाच्वंगु दु ।