निजगढ विमानस्थल दयेकेगु मोडालिटी स्वला दुने क्वःछिइगु
येँ – राष्ट्रिय गौरवया आयोजना कथं कयातःगु निजगढ विमानस्थल दयेकेगु मोडालिटी बारे सहलह जुयाच्वंगु खँ धासें उपयुक्त विकल्प मवःसां सरकारं हे दयेकेगु खँ धाःगु दु । नेपाल इन्जिनियर्स एशोसियसनं ग्वसाः ग्वःगु निजगढ अन्तर्राष्ट्रिय विमानस्थलया वर्तमान आवश्यक्ता व औचित्य विषयय् जूगु अन्तक्र्रिया ज्याझ्वलय् न्ववासें संस्कृति, पर्यटन तथा नागरिक उड्डयनमन्त्री रविन्द्र अधिकारीं विमानस्थल दयेकेगु निंतिं अन्तराष्ट्रिय दाता मालाच्वनागु व विश्वासयोग्य आधार मन्त धाःसा सरकार थम्हं हे दयेकीगु खँ धयादीगु खः ।
वय्कलं थ्व विमानस्थल दयेकेगु मोडालिटी बारे चरणवद्ध रुपं सहलह जुयाच्वंगु व वइगु स्वला दुने गुकथं दयेकेगु धयागु बारे क्वःजिइगु खँ नं धयादीगु दु । ‘आः दयेकाच्वंगु भैरहवा अन्तर्राष्टिय विमानस्थल व पोखरा क्षेत्रीय अन्तर्राष्ट्रिय विमानस्थलं निजगढ विमानस्थलया आवश्यक्ता पूवनी मखु’ धासें मन्त्री अधिकारीं धयादीगु दु, ‘निजगढ विमानस्थल दकलय् अप्वः प्राथमिकताय् लानाच्वंगु आयोजना खः ।
‘विमानस्थल दयेकेगु निंतिं अन्तराष्ट्रिय दाता मालाच्वनागु व विश्वासयोग्य आधार मन्त धाःसा सरकार थम्हं हे दयेकी’
तर मेमेगु आयोजना सुरु जुइधुंकाः नं प्राथमिकताय् लानाच्वंगु आयोजना गुकथं सुरु यायेगु धयागु हे क्वःजिइ मफुगु गम्भीर खँ खः ।’
राष्ट्रिय योजना आयोगया पुलांम्ह उपाध्यक्ष डा. जगदीशचन्द्र पोखरेलं विकास व आर्थिक समृद्धिया ल्याखं निजगढी विमानस्थल उपयुक्त विकल्प खः धासें गुलि फु उलि म्हो जक वातावरणीय क्षति जुइकथं आयोजना दयेकेमाःगु खँ धयादिल ।
अथेहे पूर्वाधारविद डा. सूर्यराज चालिसें दीर्घकालिन महत्वया थ्व आयोजना हथासं निजी क्षेत्रयात बीमजिउ धासें आयोजना न्ह्याके न्ह्यः रणनीतिक वातावणीय प्रभाव मूल्यांकन (इआइए) यायेमाःगु खँ धयादिल ।
तर पुलांम्ह सचिव वीरेन्द्रबहादुर राउतं धाःसा वातावरणीय पक्षयात कयाः विमानस्थल दयेकेगु ज्या अलमल मयासे गुलिफु उलि याकनं दयेकेगु ज्या न्ह्याकेमाः धयादीगु दु ।नेपाल नागरिक उड्डयन प्राधिकरणया आयोजना प्रमुख प्रदीप अधिकारीं हरेक ल्याखं उपयुक्त निजगढ विमानस्थलया विकल्म ममासे स्वदेशी लगानीं दयेकेमाः धयादिल ।
LEAVE YOUR COMMENTS