बजेट महयेत सरकारयात इनाप

येँ- सरकारं कन्हय् शनिवाः हयेगु धकाः तयारी यानाच्वंगु बजेट हये मदइगु माग निर्वाचन आयेगया पुलांपिं प्रमुख आयुक्ततय्सं याःगु दु । सरकारं कार्तिक २६ व मंसिर २ गते घोषणा यानातःगु चुनावय् मतदातायात प्रभावित याइ कथं नीति तथा कार्यक्रम व बजेट हये फइगु जूगुलिं पुलांपिं प्रमुख निर्वाचन आयुक्तपिसं सरकारया ध्यानाकर्षण याःगु खः ।

प्ुलांपिं न्याम्ह प्रमुख आयुक्तपिसं म्हिगः मंकाः विज्ञप्ति पिकासें धाःगु दु, ‘कार्तिक मंसीरय् प्रस्तावित प्रतिनिधिसभा निर्वाचन याकेगु भूमिकाय् दुगु वर्तमान कामचलाउ सरकारं वइगु आर्थिक दँया बजेट हयेबलय् स्वच्छ, स्वतन्त्र लिसें निष्पक्ष निर्वाचनया निंतिं समान प्रतिस्पर्धाया सिद्धान्त दुने च्वनाः मतदातायात गुगुं छगू पक्षय् प्रभाव लाइ कथं गुगुं नं कथंया न्हूगु नीति, कार्यक्रम वा बजेट विनियोजन मयायेत सरकारयात ध्यानाकर्षण याकाच्वना ।’

पुलांपिं प्रमुख निर्वाचन आयुक्तपिं सूर्यप्रसाद श्रेष्ठ, भोजराज पोखरेल, नीलकण्ठ उप्रेती, अयोधीप्रसाद यादव व दोलखबहादुर गुरुङपिसं थ्व माग यानादीगु खः । वय्कःपिंसं थज्याःगु खँय् सरकारयात इलय् हे सचेत यायेगु लागिं निर्वाचन आयोगयात नं इनाप याःगु दु ।

अथे हे पुलांपिं अर्थमन्त्रीतय्सं नं वर्तमान सरकारं पूर्ण बजेट हये मजिउगु खँ धाःगु दु । पुलांपिं अर्थमन्त्रीपिं डा. रामशरण महत, सुरेन्द्र पाण्डे, डा. प्रकाशचन्द्र लोहनी व वर्षमान पुन दथुइ जूगु भच्र्युअल बैठकय् थ्व खँ पिदंगु खः । वर्तमान सरकार काम चलाउ जुइधुंकूगुलिं पूर्ण बजेट हये मजिउगु खँ वय्कःपिंसं धयादीगु खः ।

सम्बन्धित बुखँ

LEAVE YOUR COMMENTS