छेँय् हे च्वनाः शेयर आवेदन बीफइगु

येँ- छिं छुं नं कथंया शेयर आवेदन बीमाःसा आवंनिसें छेँय् हे च्वनाः धुक्कनक्सां अनलाइनमार्फत आवेदन बीफइगु जूगु दु ।
सिडिएस एण्ड क्लियरिंग सि आस्बा प्रणाली अनिवार्य लागू यायेवं लगानीकर्तातय्सं धुक्क जुयाः छेँय् हे च्वनाः शेयर आवेदन बीफइगु जूगु खः । छेँय् हे च्वनाः आइपिओ, एफपिओ, हकप्रद फुक्क कथंया शेयर आवेदन बीफइ ।

थ्वयां न्ह्यः आस्बा प्रणाली पाखें बैंकय् वनाः शेयर आवेदन बीफइगु जुयाच्वंगु खः । आः आस्बायात हे थप परिमार्जन यानाः सि आस्बा लागू याःगु खः । सि आस्बा बाहेक आः पुलांगु परम्परागत प्रणालीपाखें आवेदन नं बीमफइगु जूगु दु । सिडिएसया प्रमुख कार्यकारि अधिकृत देवप्रकाश गुप्तां आवंनिसें न्ह्यागु कम्पनीया आइपिओ, एफपिओ वःसां सिआस्बा अनिवार्य दुगु खँ धयादीगु दु ।

आःतक २५ गू बैंक व वित्तीय संस्थां सिआस्बा प्रणालीइ दुथ्यायेधुंकूगु दु । उगु बैंक व वित्तीय संस्थाय् खाता दुपिंसं छेँय् हे च्वनाः आवेदन बीफपइ । थुकिया निंतिं लगानीकर्तां सम्बन्धित बैंकय् वनाः सिआस्बा रजिष्ट्रेशन नम्बर (सिआरएन) कायेमाः । उगु नम्बर दयेवं ‘मेरो शेयर सिडिएससी डट कम डट एनपी’ इ वनाः अनलाइन आवेदन बीफइ ।

थथे आवेदन बीबलय् आवेदन रकम बराबरया थःगु खाताय् च्वंगु ध्यबा ‘ब्लक’ जुइ । शेयर बाँडफाँट जुइधुंकाः ल्यं दुगु ध्यबा हाकनं चले यायेफइकथं जुइ । थथे यानाः आवेदन बीबलय् आवेदन तप्यंक हे विक्री प्रबन्धकया सफ्टवेयरमार्फत वइगु जूगुलिं बाँडफाँट नं याकनं यायेफइगु खँ धाःगु दु ।

सम्बन्धित बुखँ

LEAVE YOUR COMMENTS