मरुसतलय् निनाः पुजा

येँ (नेपालभाषा टाइम्स) – मरुसतः पुनर्निर्माणया झ्वलय् म्हिगः निनाः पुजा यायेगु ज्या जुल । येँ महानगरपालिकाया मेयर विद्यासुन्दर शाक्यया मू आतिथ्यय् उगु पुजा जूगु खः ।

सिखंमू बहाःया गुर्जु यज्ञमानपति वज्राचार्यया नेतृत्वय् न्ह्याःगु पुजाय् जजमान कथं मेयर शाक्य, उपमेयर हरिप्रभा खड्गी श्रेष्ठ, प्रदेशसभाया सांसद लिसें पुनर्निर्माण समितिया नायः राजेश शाक्य, न्वकु तेजरत्न ताम्राकार व २० वडाया वडाध्यक्ष राजेन्द्र मानन्धरपिं च्वनादीगु खः ।

‘नेपालभाषा टाइम्स’ लिसे खँ ल्हासें मेयर शाक्यं थुगु दँया दुने मरु सतः दयेकेगु ज्या क्वचायेमाःगु खःसां नं विश्वन्यंकं न्यनावंगु कोरोना भाइरसया कारणं क्वचायेके मफुगु धासें थ्वहे आर्थिक दँया दुने क्वचाइगु खँ कनादिल । वय्कलं धयादी, ‘वंगु आर्थिक दँया दुने क्वचायेमाःगु खः । तर कोरोना भाइरस संक्रमण दित धाःसा थ्वहे आर्थिक दँया दुने क्वचायेकेगु योजना दु।’