न्हापांम्ह मिसा कम्प्युटर इन्जिनियर गुणकेशरीयात आईसीटी अवार्ड

येँ- थुगु दँया आईसीटी अवार्ड न्हापांम्ह मिसा कम्प्युटर इन्जिनियर मय्जु गुणकेशरी मानन्धर प्रधानयात लःल्हाःगु दु । वंगु ४ गते जूगु छगू ज्याझ्वःया दथुइ मय्जु मानन्धरयात उगु अवार्ड लःल्हाःगु दु ।

थीथी विधाय् लःल्हाःगु आईसीटी अवार्ड अन्तर्गत मानन्धरयात ‘वुमन आइकन आईसीटी अवार्ड’ लःल्हाःगु खः ।

नेपाल दूरसंचार संस्थानया पुलांम्ह निर्देशक तकं जुयादीम्ह वय्कः वुमन इन इन्फर्मेशन टेक्नोलोजी (डब्लुआईआईटी)या संस्थापक नायः नं खः । वय्कलं स्कुल, कलेजया मिसापिं विद्यार्थीतय्त सूचना प्रविधिया तालिम बीगु, कार्यशाला गोष्ठि यायेगु, मस्तय् निंतिं सूचना प्रविधिया थीथी गतिविधि यायेगु नापं आवश्यककथंया तालिम व कासा तकं यायेगु ज्या याना वयाच्वनादीगु दु ।

सूचना प्रविधिया ख्यलय् स्वीछदँ ताःहाकःगु अनुभव दुम्ह वय्कःयात थःगु ख्यलय् बियादीगु योगदानयात कयाः उगु अवार्ड लःल्हाःगु खः । मय्जु मानन्धर नांजाःम्ह उद्योगपति, भाषासेवी नापं समाजसेवी लक्ष्मीदास मानन्धरया म्ह्याय् खः ।