यलया नगरप्रहरीं कथि मज्वनीगु

यल (नेपालभाषा टाइम्स) – यल महानगरपालिकाया नगर प्रहरीं आवंलि कथि मज्वनीगु जूगु दु। छुं ई न्ह्यव जक यलया नगर प्रहरी प्रमुख नियुक्त जुयादीम्ह सिताराम हाछेथुं नगर प्रहरीयात कथि मज्वँसे गस्ती यायेत आदेश बियादीगु खः । वय्कलं नगर प्रहरीया ज्या धयागु जनतायात ख्यायेगु मखसे सहकार्य यानाः न्ह्याः वनेगु जूगुलिं कथि मज्वनेगु नीति नालागु खँ धयादीगु दु ।

कथि नं छगू कथंया हतियार हे जूगु धासें वय्कलं आवंलिं नगर प्रहरीं सुयातं ख्यायेगु ज्या याइमखु धयादीगु दु। यलया नगर प्रहरीं २०५५ सालं निसें कथि ज्वनेत अनिवार्य याःगु खः । कथि ज्वना वनेबलय् स्वये हे ख्यायेत वःगु थें जुइगु धासें नगर प्रहरी प्रमुख हाछेथुं नगर प्रहरीया छवि बांलाकेत नं कथि मज्वनेगु निर्णय यानागु खँ धयादीगु दु। थ्व निर्णय कथं म्हिगः सोमवाः निसें हे गस्तीइ वनीपिं नगर प्रहरीं कथि ज्वनेगु त्वःतूगु दु ।

वय्कलं आवंलिं नगर प्रहरीं सम्झे बुझे यायेगु ज्या याइ, सम्झे बुझे यानाः नं मजिल धाःसा कानून कथं दण्ड जरिवाना याइगु खँ नं धयादीगु दु। हाछेथु नगर प्रहरी प्रमुख कथं वयेधुंकाः वय्कलं दकलय् न्हापां लँय् पिने दिकाः मोटरसाइकल दयेकीपिंत मोटरसाइकल पिने मतयेत इनाप यासें चिइकेगु सुरु याःगु खः । थ्व धुंकाः सतक पेटी सामान ब्वयाः पसः तयाच्वंपिंत नं सामान पिने तयेके मबिउगु खः ।