सम्पदा अवलोकन यायेत सिटी बस

येँ(नेपालभाषा टाइम्स)- सरकारं स्वनिगः दुनेया सम्पदा अवलोकनया निंतिं सिटी बस संचालनय् हइगु जूगु दु । संस्कृति, पर्यटन व नागरिक उड्डयन मन्त्रालयं स्वनिगःया सम्पदा अपलोकनया निंतिं सिटी बस संचालनय् हयेत्यंगु खः ।

संस्कृति, पर्यटन व नागरिक उड्डयन मन्त्री जीवनराम श्रेष्ठं थन जूगु छगू ज्याझ्वलय् नवासें स्वनिगःया सम्पदा अवलोकनया निंतिं ‘हप अन हप अफ’ सिटी बस संचालनय् हयेगु तयारी जुयाच्वंगु जानकारी बियादीगु खः ।

मन्त्री श्रेष्ठं स्वनिगःया संस्कृति, सम्पदा अवलोकन यायेत वइपिं स्वदेशी व विदेशी पर्यटकया निंतिं उकथंया सिटी बस संचालनय् हयेत्यनागु जानकारी बियादीगु खः । सार्वजनिक सवारी साधनपाखें सम्पदा अवलोकन सहज मजुइगु जूगुलिं सम्पदा अवलोकन याइपिं पर्यटकतय्त सहजताया निंतिं ‘हप अन हप अफ’ सिटी बस संचालनया अवधारणा न्ह्यःने हयागु वय्कलं कनादिल ।

थ्व हे झ्वलय् येँया प्रमुख निगू सम्पदा स्वाइगु बसन्तपू लाय्कूनिसें स्वयम्भू तकया करिब २ दशमलव २ किलोमिटर क्षेत्रयात सम्पदा मार्गया रुपय् विकास यायेगु योजना नं कार्यान्वयनया निंतिं प्रक्रियाय् वनेधुंकूगु वय्कलं जानकारी बियादिल । थुगु सम्पदा मार्गय् मनूया जन्मनिसें मृत्यु संस्कार तकया संस्कृतियात पिब्वयेगु नापं पर्यटकयात आकर्षित यानाः उगु लागाया स्थानीतय् आर्थिक स्तर थकायेगु नं ग्वसाः दुगु मन्त्री श्रेष्ठं धयादीगु दु ।

अथे हे स्वनिगलय् रात्रीकालीन पर्यटन प्रवद्र्धन यायेगु नापं थनया मूर्त अमूर्त सांस्कृतिक सम्पदात संरक्षण यायेगु ज्यायात नं मन्त्रालयं प्राथमिकता बिया वयाच्वंगु वय्कलं धयादीगु दु ।