मनपाया बेरुजु ४ अर्ब

येँ (नेपालभाषा टाइम्स)- नेपाल सरकार जक मखु, स्थानीय सरकारतय्गु बेरुजु तकं थौंकन्हय् तसकं अप्वया वनाच्वंगु खँ येँ मनपाया बेरुजुं क्यनाच्वंगु दु । दँय्दसं थहां वनाच्वंगु येँ मनपाया बेरुजु थ्व दँय् ४ अर्ब ३ करोड ६ हजार तका थ्यंगु दु ।

मनपां बेरुजु फछ्र्यौट यायेत विशेष योजना हे दयेकाः ज्या न्ह्याकूसां नं उकियात क्वचायेके धाःसा फयाच्वंगु मदुनि । म्हिगः क्वचाःगु मनपाया १४ क्वःगु नगरसभाय् लेखा समितिया प्रतिवेदन पेश यासें समितिया संयोजक गायत्री पुडासैनीं बेरुजुया थ्व किपा न्ह्यब्वयादीगु खः ।

वय्कलं कनादीकथं थ्व दँय् मनपां १ अर्ब १६ करोड २८ लाख ६९ हजार ४१२ तकाया बेरुजु नियमित याःगु दु । मेगु नं बेरुजु फछ्र्यौटया कुतः जुयाच्वंसां उकियात पूवंके धाःसा फयाच्वंगु मदु ।

येँ मनपाय् विशेष यानाः निर्माणया ज्या यायेत यंकूगु ध्यबाया बेरुजु पिहां वइगु खँ धाःगु दु । थुकी गुलिखे वडा अध्यक्षतय्गु नां समेत स्वानाच्वंगु दु । थ्व स्वयां न्ह्यः बेरुजु दुपिं वडाध्यक्ष–तय्त चुनावय् दने मदइगु व्यवस्था यायेगु कुतः समेत न्ह्याःगु खः ।

म्हिगः येँ मनपाया मेयर बालेन साहया अध्यक्षताय् च्वंगु नगर सभाया बैठकय् उपमेयर लिसें बजेट तर्जुमा समितिया संयोजक सुनिता डंगोलं ९ करोड २१ लाख तकाया संशोधन बजेट नं न्ह्यब्वयादीगु खः । अथे हे मनपाया प्रवक्ता लिसें येँ १७ वडाया वडा अध्यक्ष नविन मानन्धरं सूचना तथा सञ्चार ऐन २०८० या न्हापांगु संशोधन पेश यानादीगु खः । बैठकय् थीथी सदस्यतय्सं न्ववायेगु झ्वलय् न्हू सतकया लँ चिब्या यानाः पेटी तब्या यायेगु मनपाया योजना, खुलामञ्चय् फुटबल ग्राउण्ड दयेकेगु योजना आदिया बारे न्ह्यसः तःगु खः ।