बद्री गुरुजुया झ्वाता पलिस्था

येँ – नेपाःया वज्रयानी बौद्ध धर्मया ख्यलय् अतिकं नांजाःम्ह पं. बद्रीरत्न वज्राचार्य (बद्री गुरुजु)या झ्वाता पलिस्था याःगु दु । वंगु दिल्लाथ्व पुन्हि (गुरुपुन्हि)कुन्हु थनया बिज्यासःस्थित वैरोचन तीर्थया धम्म हलय् वसपोलया झ्वाता अनावरण याःगु खः ।

वज्राचार्य अध्ययन मण्डलया ग्वसालय् जूगु ज्याझ्वलय् लुम्बिनी विश्वविद्यालयया पुलांम्ह उपकुलपति प्रा. डा. नरेशमान वज्राचार्य व वसपोलया ४ दँ दुम्ह छय् प्रिन्स वज्राचार्यं मंकाःकथं पं. बद्रीरत्नया झ्वाता अनावरण यानादीगु खः ।

अध्ययन मण्डलया नायः सानुराजा वज्राचार्य (सारा वज्र)या सभापतित्वय् दशरत्न वज्राचार्य, राजु वज्राचार्य व शान्तरत्न वज्राचार्यपाखें स्वस्ति वाचन यासें ज्याझ्वः न्ह्याकूगु खः ।

शोभा वज्राचार्यं न्ह्याकादीगु ज्याझ्वलय् श्रद्धेय धम्मावती गुरुमां व येँ देय्या देय् थाय्पापाखें छ्वया हःगु भिंतुना सन्देश ब्वनाः न्यंकूगु खः । ज्याझ्वलय् बौद्ध विद्वान प्रा. डा. वज्राचार्यं त्रिरत्न शरण गमन पाठ यानाबिज्याःगु खःसा राजु वज्राचार्यं पं. बद्रीरत्नयात लुमंकाः सकसिगुं प्रतिनिधित्व यासें पाठ यानाबिज्याःगु खः ।

ज्याझ्वलय् प्रा. डा. वज्राचार्य, करुणामय पुजा सेवा खलःया शान्तरत्न वज्राचार्य व सभानायः वज्राचार्यं पं. बद्री गुरुजुया योगदान व वसपोलया थीथी पक्षयात कयाः नुगःखँ प्वंकादीगु खः । बद्री गुरुजुया झ्वाता पलिस्था यायेत श्री करुणामय पुजा सेवा खलःपाखें विशेष भूमिका म्हितूगु खः ।

सम्बन्धित बुखँ

LEAVE YOUR COMMENTS