स्वयम्भू, पशुपति व खास्थि जक मखु, बहाः, बही नं झीगु सम्पदा खः

येँ – येँ महानगरपालिकां न्ह्याका वयाच्वंगु मेट्रो एफएम ९४.६ मेगाहर्जया नीक्वःगु वार्षिकोत्सव म्हिगः थनया राष्ट्रिय सभागृहय् जुल ।
येँ महानगरपालिका सूचना प्रविधि विभागया प्रमुख राज्य प्रकाश प्रधानांगया सभापतित्वय् जूगु ज्याझ्वलय् वय्कलं हे लसकुस यानादीगु खः ।

ज्याझ्वलय् लसकुस यायेगु झ्वलय् वय्कलं भाषा, कला, संस्कृति, लिपिया संरक्षण यायेगु मनपाया नीतिकथं हे थुगुसी एफएमया वार्षिकोत्सवया लसताय् न्हापांखुसी रञ्जना लिपि च्वज्या धेंधेंबल्लाः कासा यानागु धासें कासाय् ब्वति काइपिनिगु उत्साह खनाः लिपि संरक्षण यायेगु मनपाया नीतियात नं तिबः जू वंगु दु धयादिल ।

येँ मनपाया प्रमुख प्रशासकीय अधिकृत केदार न्यौपानें नेपाःया थःगु हे मौलिकता दुगु नेपाल लिपियात अझ न्ह्यःने यंकेगु स्वयेमाः धासें उकिया निंतिं ल्याय्म्ह पुस्ता हे न्ह्यचिलेमाःगु धयादिल ।

मूपाहांया थासं येँ महानगरपालिकाया प्रमुख विद्यासुन्दर शाक्यं मेट्रो एफएम राज्य पक्षपाखें संचालन जुयाच्वंगु संचारमाध्यम जूगुलिं मेमेगु संचारमाध्यमं थें गलतयात सही यायेगु मखसे सहीकथंया सूचना, समाचार जनसमक्ष थ्यंकेत अपिल यासें उकिया निंतिं महानगरपालिकां नं ग्वाहालि यायेगु जुइ धयादिल ।

मेट्रो एफएम संचालन जूगु इलंनिसें थौंया अवधितक थ्यंगु इलय् संचारलिसें प्रविधिया ख्यलय् तकं गाक्कं हिउपाः वयेधुंकूगु धासें वय्कलं धयादिल, ‘मेट्रो एफएमया प्रशारण शुरु जूगु इलय् सूचना, संचार व प्रविधिया ख्यः आःथें विकास मजूगु ई खःसा थौंया इलय् तक थ्यंगु इलय् गाक्कं विकास जूगु जक मखु, संचारमाध्यमत नं आपालं दयेधुंकूगु व मनपापाखें संचालन जुयाच्वंगु एफएमं बिस्कं कथंया प्रस्तुतित बियाः महानगरवासीया नुगः त्याकेगु स्वयेमाः ।’

‘थः स्वयां कनिष्ठम्हं थःत लिफ्यानाः न्ह्यःने वन धाःसा न्ह्याम्हेसिया नं नुगलय् स्यायेफु’, वय्कलं धयादिल, ‘यदि वयागु क्षमतां न्ह्यःने वंगु खःसा थज्याःगु यथार्थयात स्वीकार यानाः नुगः मुइकाः च्वनेगु मखसे न्ह्यःने वंम्हेसित लिफ्यायेगु स्वयेमाः ।

नकतिनि क्वचाःगु यँयाःया निंतिं विदेशी पाहांपिंत ब्वनागु सन्दर्भयात कयाः वय्कलं धयादिल, ‘विश्व सम्पदाय् दुथ्यानाच्वंगु स्वयम्भू, पशुपति व खास्थि जक झीगु सम्पदा मखु, थनया दुने दुने च्वंगु बहाः, बही, चुक, ननि, लाछि, फल्चा, सतः आदि नं झीगु सम्पदा खः ।’ एफएमया बुन्हिया लसताय् न्हापांखुसी जूगु रञ्जना लिपि च्वज्या कासाय् उत्कृष्ट जुयादीपिंत वय्कलं दसिपौ व दां सिरपाः नं लःल्हानादीगु खः ।

लिपि च्वज्या कासाय् न्हाप जुयादीम्ह सजिन डंगोल, लिउ जुयादीम्ह राजन डंगोल व लियांलिउ लाःम्ह वीरकाजी वज्राचार्ययात छसिकथं नीन्याद्वः, झिंन्याद्वः व झिद्वः तका दांलिसें दसिपौ वय्कलं लःल्हानादीगु खःसा हःपाः सिरपाः त्याकादीपिं अनिल महर्जन, मञ्जु महर्जन, सुयोग्यरत्न ताम्राकार, प्रजिना शाक्य, मणिराज मानन्धर, सविना महर्जन, अंशु श्रेष्ठ, हिराभाई शाक्य, साहिल महर्जन व सशांक रंजितयात नं म्हतिं द्वःछि तका व दसिपौ लःल्हानादीगु खः ।

अथे हे लिपि च्वज्या कासाय् निर्णायकमण्डलय् च्वनादीपिं मदनमुनि वज्राचार्य, राजेन्द्र शाक्य व अनिल स्थापितलिसें कासाय् प्राविधिक ग्वाहालि याःगु नेपाल लिपि गुथियात नं सुभाय पौ लःल्हानादीगु खः । ज्याझ्वलय् थीथी सांस्कृतिक ज्याझ्वः नं न्ह्यब्वःगु खः ।