कच्चा चिकंया भाः थहांवन

साउदी अरबया चिकं प्रशोधन केन्द्र जूगु आक्रमण लिपा कच्चा पेट्रोलिमय पदार्थया भाः थहां वंगु दु । शनिवाः जूगु ड्रोन आक्रमण लिपा चिकंया भाः वंगु प्यला दुनेया दकलय् अप्वः थ्यंगु दु । थ्व आक्रमण लिपा सउदी अरबं चिकं व ग्यासया उत्पादन कटौती याःगु खः । विश्वन्यंकं खपट जुइगु चिकंया थ्यंमथ्यं ५ प्रतिशत उत्पादन म्हो जुइवं चिकंया भाः थहां वंगु खः ।

सोमवाः व्यापार सुरु जुइवं ब्रेन्ट धाइगु कच्चा चिकंया मू १९ प्रतिशतं थहां वनाः प्रतिब्यारल ७१.९५ डलर थ्य.गु खःसा वेस्ट टेक्सस इन्टरमिडिएट धाइगु मेगु कच्चा चिकंया भाः १५ प्रतिशतं थहांवनाः प्रतिब्यारल ६३.३४ डलर थ्यंगु खः । आः सउदी न्हापा थें चिकं उत्पादन सुरु यायेत छुं वाः लगे जुइतिनिगु खँ धाःगु दु ।

सउदीं चिकंया उत्पादन म्हो यायेवं अमेरिकां थःथाय् भण्डार यानातःगु चिकं मीगु निंतिं राष्ट्रपति डोनाल्ड ट्रम्पं अनुमति बिउगु खः । अमेरिकी भण्डारया चिकं बजारय् वयेवं चिकंया भाः छुं भचा म्हो जूगु खः । अमेरिकी विदेशमन्त्री माइक पोम्पेओं सउदी चिकं प्रशोधन केन्द्र जूगु आक्रमणय् इरानया ल्हाः दुगु द्वपं बिउगु दुसा इरानं धाःसा थ्व द्वपंया खण्डन यासें थ्व अमेरिकां षडयन्त्र यानाः ‘जाः ग्वःगु’ खँ धाःगु दु ।

सम्बन्धित बुखँ

LEAVE YOUR COMMENTS