हलिं नेवाः दबूपाखें गद्यगुरु निष्ठानन्दया बुन्हि हन
येँ (नेपालभाषा टाइम्स)÷ हलिं नेवाः दबूया ग्वसालय् गद्यगुरु पं. निष्ठानन्द वज्राचार्यया १६७ क्वःगु बुन्हि हंगु दु । वंगु थिंलाथ्व तृतीया कुन्हु जूम प्रविधि पाखें न्ह्याःगु थुगु ज्याझ्वलय् थीथी देय्पाखें ब्वति काःगु खः ।
दबूया केन्द्रीय नायः संयुक्त श्रेष्ठं निष्ठानन्दया किपा न्ह्यःने त्वाःदेवाय् मत च्याकाः लसकुस यानादीगु ज्याझ्वलय् ईलोकं प्रकाशनया संरक्षक नरेशवीर शाक्य मू न्वचु बियादीगु खः । वय्कलं पं. निष्ठानन्दया तःजिगु कृति ललितविस्तर सफूया बारे दुग्ययेकाः खँ कनादीगु खः । थ्व झ्वलय् वय्कलं निष्ठानन्दं च्वयादीगु ललितविस्तर ताइवानपाखें जक हे नीच्याद्व प्रति सफू पिथनेज्या जूगु झीगु निंतिं गौरवया खँ खः धयादिल ।
नेवाः देय् दबूया नायः पवित्र वज्राचार्यं पं. निष्ठानन्दं ललितविस्तर जक मखु, मेमेगु नं यक्व कृति सृजना यानाः नेपालभाषा साहित्यख्यःयात तःमि यानादीगु दु धयादिल । थ्व झ्वलय् वय्कलं ललितविस्तरया प्रशंसा जक यायेगु मखु, थुकियात सकसिनं अध्ययन नं यानादीत इनाप यानादिल ।
अथेहे दबूया साहित्यिक एम्बेस्डर लोककवि राजभाइ जकःमिं निष्ठानन्दबारे थःगु चिनाखँ न्यंकुसें निष्ठानन्द नेपालभाषाया पुनर्जागरण याःपिं प्यंगः थां मध्ये दकलय् थकालिम्ह महारथी जूगु खँ कनादिल । पत्रकार सिल्भिया राजोपाध्यायं न्ह्याकादीगु थुगु ज्याझ्वलय् दबूया केन्द्रीय छ्याञ्जे लुभु श्रेष्ठं सुभाय् देछायादीगु खः ।
LEAVE YOUR COMMENTS