ने. सं. ११४४ कौलाथ्व पारू - नःलास्वनेगु

मांकाःद्यः, पालाःद्यः, भद्रकाली दर्शन मयाकीगु

येँ – येँया २२ वडाय् लाःगु प्रसिद्ध देगलय् थनिनिसें द्यःया दर्शन यायेगुलिं प्रतिबन्ध तःगु दु । २२ वडाया वडाध्यक्ष चिनकाजी महर्जनं संकटा मन्दिर संरक्षण समितिया छगू पौं च्वयाः हलिंन्यंकं कोरोना भाइरसया प्रकोप न्यना वनाच्वंगु धासें २२ वडाय् लाःगु फुक्कं देगलय् नित्य पुजा बाहेक भक्तजनयात देगलय् दुमकायेत इनाप यानातःगु दु ।

२२ वडाय् लाःगु तेबाः भद्रकाली, महांकाः द्यः व वतु भद्रकाली सर्वसाधारणयात दर्शन मयाकेगु कथं व्यवस्था यायेत इनाप यानातःगु दु । सरकारं नीन्याम्ह स्वयां अप्वः मनू मनूनेत व सार्वजनिक ज्याझ्वः मयायेत इनाप यायेधुंकाः २२ वडा उगु सुचं जारी याःगु खः ।
वडाध्यक्ष महर्जनं ‘नेपालभाषा टाइम्स’ लिसे खँ ल्हायेगु झ्वलय् कोरोना भाइरसया संक्रमण क्वमचाःतले देगलय् सर्वसाधारणयात दर्शन यायेगुलिं प्रतिबन्ध तयाःगु खँ धयादीगु दु । वय्कःया कथं विशेष यानाः संकटा व महांकाः देगलय् सनिवाः व मंगलवाः आपालं मनू मुनिगु जुयाः उगु प्रतिबन्ध तयेमाःगु खँ कनादीगु दु ।

लिसें वय्कलं संरक्षण समितियात कोरोना भाइरसया प्रकोपयात ध्यानय् तयाः देगः व्यवस्थापन समितियात देगः बन्द यानाः ग्वाहालि यायेत नं इनाप यानादीगु दुसा सर्वसाधारण जनतायात नं कोरोना भाइरसया प्रकोप म्हो मजूतले देगलय् वनाः पुजा यायेगु ज्या बन्द यायेत नं इनाप यानादीगु दु ।

थ्वहे झ्वल संस्कृति, पर्यटन व नागरिक उड्डयन मन्त्रालयं थीथी देगः, गुम्बा, चर्च, मस्जिदय् पुजा प्रार्थना याःवनीपिंत नं सचेत जुइत धाःगु दु । मन्त्रालयं थज्याःगु थासय् नं २५ म्हं अप्वः मुनाच्वनेत प्रतिबन्ध तःगु दुसा द्यःयाथाय् पुज्यायेत झ्वःछुइबलय् नं निम्हेसिया दथुइ १–१ मिटरया दुरीइ च्वनाः जक झ्वःछुइत धाःगु दु ।

अथेहे थज्याःगु धार्मिक स्थलय् साब्वं लखं ल्हाः तुति सिलेगु व्यवस्था यायेमाःगु, निश्चित समयावधी दुने सुचुपिचु यायेमाःगु व थन वइपिं तीर्थालुपिंसं नं अनिवार्य रुपं मास्क तयेमाःगु खँ धाःगु दु ।

अथेहे पर्यटकीय सवारी साधनय् नं क्षमता स्वयां अप्वः यात्रु तयेमदइगु, सवारी साधनयात भाइरसमुक्त यायेमाःगु निर्णय नं याःगु दु । थुकिया अनुगमनया निंतिं पर्यटन विभाग, पर्यटन बोर्ड व पर्यटन प्रहरीयात खटे याइगु जूगु दु ।