छ्यंगू दान जनचेतनामूलक ज्याझ्वः

येँ –  स्थापित खलः, मिसा पुचःया ग्वसालय् छ्यंगू दान सम्बन्धी जनचेतनामूलक ज्याझ्वः जुल । थनया जमलय् च्वंगु ग्राण्ड सिटी हस्पिटलय् जूगु ज्याझ्वः लायन्स क्लब अफ काठमाडौं सुकुन्दाया ग्वाहालिइ जूगु खः । पुचःया नायः सुशिला स्थापितया सभापतित्वय् जूगु ज्याझ्वलय् प्रभा स्थापितं लसकुस यानादीगु खःसा खलःया नायः सुवर्णकाजी स्थापितं ज्याझ्वःया उद्देश्ययात कयाः ध्वाथुइकादीगु खः ।

ज्याझ्वलय् कीर्तिपुर अस्पतालया प्लाष्टिक सर्जन डा. शंकरमान राईं मनूया म्हय् मिं पुनाः जुइगु समस्या, ला, छ्यंगूया महत्व, थुकिया आवश्यकता लगायत थीथी पक्षयात कयाः जानकारी बियादीगु खः । लिसें वय्कलं छ्यंगू दानया महत्वयात कयाः ध्वाथुइकादिसें थज्याःगु ज्यां मिं नःपिं, एसिड आक्रमणय् लाःपिं, च्वापुं नःपिं, विद्युत आदिया कारणं छ्यंगू स्यंपिंत ज्या वइगु खँ कनादिल ।

ज्याझ्वःया मू वक्ता डा. अनन्तप्रसाद श्रेष्ठं छ्यंगू बैंक व छ्यंगू दानया विषयय् थःगु नुगःखँ प्वंकादीगु खः । ज्याझ्वलय् लायन्स क्लब अफ काठमाडौंया उत्तमराज कायस्थ, स्कीन डोनेशन सर्भिसया नायः विश्वनारायण श्रेष्ठ, लायन्स क्लब अफ सुकुन्दाया नायः विजयलक्ष्मी श्रेष्ठ लगायत आपालं व्यक्तित्वपिनिगु उपस्थिति दुगु खः ।

सम्बन्धित बुखँ

LEAVE YOUR COMMENTS