ने. सं. ११४६ अनलाथ्व नवमी -

अमेरिकाय् रथ सालाः येँयाः

येँ – अमेरिकाय् थुगुसी नं कुमारीया रथ हे सालाः यँयाः न्यायेकल । अमेरिकाय् च्वंपिं नेवाःतय्गु संस्था नेवाः अर्गनाइजेशन अफ अमेरिकाया ग्वसालय् अनया मेरिल्याण्डस्थित ब्ल्याक हिल रिजन पार्कय् कुमारीया रथ सालाः यँयाः न्यायेकूगु खः । उगु संस्थापाखें थगुनेनिसें रथ हे सालाः यँयाः न्यायेकेगु शुरु याःगु खः ।

ज्याझ्वलय् धिमे थानाः सहभागीतय्सं हस्ते हैंस्ते धासें खिपतं रथ सालाः पार्क लागाय् चाःहीकूगु खः । रथय् मचा मिसा मचायात कुमारी कथं फ्यतुकूगु खः । थुकिया नापं लाखे, पुलुकिसि नं चाःहीकूगु खःसा हाथुद्यःया किपा न्ह्यःने समय्द्वँ ब्वःगु खः । उगु ज्याझ्वलय् उखे झायाच्वंम्ह नेवाः न्ह्यलुवा लिसें संघीय समाजवादी पार्टीया सहअध्यक्ष राजेन्द्र श्रेष्ठ मूपाहां कथं झाःगु खः । ज्याझ्वलय् भाजु श्रेष्ठं येँयाः लिसें नेवाः पहिचान बारे नं कनादीगु खः ।